رسمتها ف لحظة تجلى ف درس العربي تانى يوم رمضان
من وانا ف الابتدائي انا فاكره اول مره رحت اصلي مع ماما هناك كان معايا بسنت بنت عمي هي اصغر مني بسنتين وما شاء الله منظرنا كان ف يؤهلنا لدخول الديسكوا مش الجامع كنا احنا الاتنين لابسين استرتش انا جينز وهيا قماش ولابسين بلوزات قصيره والطرحه موجوده اثبات حاله بس حاليا الحمد لله الوضع اختلف
امى كانت بتصلي معايا هناك واختى احيانا بس اختى بقت بتصلي ف جامع جمب البيت وامى بتضطر تقعد تصلي ف البيت
ف الغالب بتاخر على الصلي شويه بس بلحق اول ركعه
كان المعتاد ان الجامع بيكون زحمه ف الايام الاخيره من رمضان كان ماشاء الله متكربس من اول رمضان انا دخلت الجامعه بمعاناه والواحد واقف محشور ،كل رمضان بكون صداقات بريئه مع اطفال الجامع السنه اللى فاتت كان صاحبي عمار السنه دى لسا معرفتش اسم صاحبي الجديد بس واد سكر
كل يوم وانا رايحه الجامعه اكون ف نص الطريق والاقى شيخ جامع بيقول ركعة الوتر اثابكم الله اتخيل انى اتاخرت والمشوار راح على مفيش بس اوصل هناك الاقيهم ف اول الصلي عشان الجوامع التانيه ماشيه على نظام جامع المسافرين
____
ساعة السحور بقي بقضيها ف البلكونه بحب اتفرج على الدنيا وهي فاضيه_الدنيا من البلكونه لا تتجاوز شارعنا_بيبقي الجو جميل اوى بليل والحلو ان الدنيا بتبقي ضلمه فا بطلع البلكونه من غير ما اغطي شعري واقعد على السور بيبقي احساس مبهج
مامتى حبيبتي متعوده تنكد عليا ف اكل السحور ف الغالب مش بيكون على مزاجى بس بقول لنفسي استحمل احنا ف ايام مفترجه مش وقت شكل مع ماما تصدقوا البيض المسلوق بقي ضيف دايم على السحور والبيض المسلوق اكتر شيء بشمئز منه ف الاكل ببقي ناويه اكل حاجات تانيه بس اكل البيض والدنيا تقفل معايا واقعد ساكته لانى لو اتكلمت هيبقي صباح سعيد بزياده اهى امى واستحملها زى ما بتستحملنى
بحب اقعد ف البلكونه اشوف الناس وهي رايحه وراجعه من صلاة الفجر وبستمني اه والله بستمني من اعماق قلبي دا يحصل طول السنه مش ف رمضان بس
ساعة الفجريه دي بتحرك جوايا رغبه مجنونه مش قادره احققها ومش قارده اتخلى عنها نفسي انزل اجرى ف الشارع حافيه والارض منديه ومفيش احلى من لحظات الشروق بحب اراقب شروق الشمس منظر باعث للتفاؤل _______
وانا صغننه كان فى عمو مسحراتى بيلف ينادى وكنت ف الفتره دى مش بصوم ولما بدءت اصوم بانتظام ماما كانت بتصحيني قبل الفجر بشويه تاكلنى كنت بطلب منها دايما تصحيني لما لمسحراتى يجيي احيانا كانت بتحاول واحيانا كنت بصحي واحيايين مكنتش بقدر
حاليا والحمد لله مبقاش قى عمو مسحراتى لدرجة انه هاين عليا اشتغل مسحراتى انا ___________
رمضان ميبقاش رمضان من غير الفوانيس والشراشيب
بيتنا وهو مدلع وبلكونتا ف النص مضلمه
كنت بعمل انا و ولاد عمى وبنات عمى و ولاد الجيران شراشيب بس دا زمان ايام ما كنت بلعب معاهم ف الشارع_عادي يعني الواحد ميبقاش عاش طفولته لو ملعبش ف الشارع_لما كبرنا بقي العاده انقطعت شويه بس مؤخرا الشباب اللى ف الشارع بيتكفلوا بالمهمه دي اليوم اللى قبل العيد لقيت عمي علق فوانيس ونور على بلكونته وتانى يوم الصبح لقيت الشارع مليان شراشيب بعدها بيوم عمى التانى حط فانوس ف بلكونته
اما انا بقي مجابوليش فانوس دا حتى عمو الشحات _دا اسمه والله مش قصدي حاجه دا اغنى من اللى جابوني_حاطين فانوس ف بلكونتهم وحاطين عليه ورد صناعي كده نصيب شارعنا تلت فوانيس كان نفسي اجيب فانوس بس المشروع فشل بسبب انشغالنا ف شوية حاجات مكانش الجو مناسب لرغباتي الطفوليه دى قلت لماما عايزه فانوس يدي لفوانيس الشارع بالشبشب وان شاء الله هيحصل بس رمضان الجاى
__________
ساعة الفطار لازم افطر على تمره واشرب مايه وممكن عصير او مياه غازيه او خروب واصلي المغرب وبعدها افطر وف الغالب مش باكل اوى ف رمضان اقل من الايام العاديه المعده بتكون معندهاش استعداد تهضم يعني هي فاضيه من الفجر اجى اشغلها على اخر اليوم
جو الصيام بياثر عليا شهر كمان بعد رمضان بفضل مش مقبله على الاكل دا غير انى بصوم بعد رمضان عالطول
_______
مخرجتش من البيت اول يوم من رمضان مكانش عندي دروس بس تانى يوم وانا رايحه الدرس بعد العصر لقيت الناس امم طالعه من الجامع وفارشين حاجات يصلوا عليها ف الشارع اكيد انتوا عارفين منظر الجامع بيكون عامل ازاى ف غير رمضان
لو شوفت شخص بياكل ف الشارع ف رمضان ،ايه الفكره اللى هتيجي ف دماغك ؟؟اكيد انه مش مسلم
بس معلش يعني فى رجاله وشباب بياكلوا ف الشارع ف رمضان وهما مسلمين ومنهم اللى بيدخن وعايش دور الصايم
يكون شعورك ايه لما تبقي ماشي سواء الصبح او بليل وشايف الشباب لسا بناطيلهم واقعه منهم وكل واحد ماسك موبايله ومشغل الاغانى عليه مش مكتفي بانه يسمع لاء يسمع الناس كمان
ويكون شعورك ايه لما تلاقى البنت الى كانت بتحط ميك اب وبتلبس لبس مش ولا بد لسا على حالها دا ف رمضان ويكون شعورك ايه لما تلاقى البنت اللى كانت بتلبس مش ولا بد تيجي ف رمضان تلبس عبايه سواء كانت العبايه واسعه ولا ضيقه بس المهم ان البادى والبنطلون بقوا عبايه ؟؟
يكون شعورك ايه لما تكون رايح او راجع من الجامع وشباب الغد المشرق_ال مشرق ال_قاعدين على القهاوى يشيشوا ولا لامين الشله وسرانين ف خيمه شيطانيه_اللى بيقولوا عليها رمضانيه دي_؟؟
يكون شعورك ايه لما تشوف واحد ف نهار رمضان بيقول لواحد ف الشارع وبعلو صوته هفطر عليك؟؟
يكون شعورك ايه لما تشوف واحد عمال يسب ويلعن ويدعى بعدها انه صايم ؟
ويكون شعورك ايه لما تلاقى شله لطيفه قاعده تتكلم على المسلسل الفلانى اللى على القناه الفلانيه بدل ما يستغلوا رمضان ف العباده على اعتبار ان رمضان اقوي موسم للمسلسلات مش موسم عبادات؟؟
بكون شعورك ايه لما حبيبك او حبيبتك يركب الوش الخشب معاك ف رمضان على اساس اننا ف رمضان يعني وبقيت السنه ايزي؟؟
وبكون شعورك ايه تجاه شخص عنده رمضان زي شعبان زي اى شهر و اى يوم؟؟
ويكون شعورك ايه لما تشوف طفل صغنن ماشي ف الشارع ياكل ويشرب كل ما لذ وطاب واشبع واسمن ؟؟
هقول انا شعورى ف الموقف دا ،شعور بالفتنه والاغراء شعور مثير للمعده والبنكرياس
وكل سنه وفوانيسنا صيني وياميشنا سورى
