كلمات حرة..مباشرة

2009-08-31T21:16:00.003+02:00

كلما فكرت ان اكتب و شرعت ف الكتابه و طاوعني كل من قلبي و عقلي و لوحة مفاتيحي وبدءت اخط السطور و اخذت الافكار تتشعب وتتشابك وتتبلور اتوقف واحذف ما كتبت ،ولا اعلم لماذا... لدي ما اقول ولكن لا استطيع قوله ولا اعلم لماذا... اختصر عواطفى فى بعض النثر و قصائد الشعر واحبس قصائدي حينا واحيانا اطلقها

الا يستحق الامر وقفه

2009-03-16T22:18:00.003+02:00

القاهرة أعلنت في ديسمبر/ كانون الأول المنصرم نيتها إرسال قوة بحرية لمواجهة القرصنة قبالة سواحل الصومال، حيث تجوب المنطقة بالفعل سفن حربية أميركية وأخرى من دول أوروبية وآسيوية لحماية السفن التجارية من القراصنة. غير أنه لا يبدو أن القراصنة يرتدعون بهذه الجهود الدولية، إذ بلغ عدد السفن التي تعرضت لهجمات العام الماضي وحده نحو 110, بينها 42 اختطفت, 14 منها ما زالت محتجزة ومعها 240 شخصا من أطقمها।(من موقع الجزيره)

الوضع ف الصومال سيئ جدا لكن دا مش مبرر مطلقا للى بيحصل دا،سمعنا كلنا اكيد عن السفينه بلو ستار وقصة كفاح طاقمها و صاحب اشركه المالكه ليها خلال ما يزيد عن شهرين وسمعنا عن حوادث تانيه كتير زي القرصنه على ناقلة النفط السعوديه اللى تعتبر اكبر ناقلة نفط ف العالم اللى طالبين فيها 25مليون دولار ولسا محتجزينها

اللى بيحصل دا مهزلة بكل المقاييس القرصنه الصوماليه موجوده من فتره طويله و كل مدى خطرها بيتعاظم والمهزله الاعظم تجاوب الدول معاها و دفع الفديات المطلوبه كانها دوله اخدت اسري وبيتعمل معاها مفاوضات لاستردادهم

ارواح الناس مهمه و ممتلكاتهم مهمه والاحساس بالامن اهم।انا شوفت البحاره اللى كانوا على السفينه بلو ستار ولقائهم على قناة المحور ومن خلال التفاصيل اللى زكروها حسيت اد ايه العالم دول معندهمش ضمير غير الفديه اللى طلبوها واتدفعت بعد مفاوضات لتتخفضيها اول ما طلعوا السفينه اخدوا الممتلكات الخاصه بالطاقه و الزعيم بتاعهم قالهم(هذا حقي) اى حق وباي حق واي شرع

بيراودنى سؤال يا تري ملايين الدولارات اللى بياخدوها دى بيعملوا بيها ايه؟

فى نكته مضحكه اوى بخصوص الموضوع دا ان احدى السفن المحتجزه سفينه اروكرانيه عليها ३३ دبابه

لحد دلوقتى الناس دي كل همها الفلوس لو غيروا تفكيرهم ولازم هيتغير هيحصل ايه ؟؟

هو اللى بيحصل دا مش ارهاب وتخويف؟؟امريكا بتقول ان الموضوع صعب اكبر قوة عسكريه بتقول كده نفهم من الكلام دا انهم اقوي من الامريكان ولا فيه ايه

العالم هيتحرك امتى ويوقفهم ؟؟ميعرفوش يضربوهم من البحر والجو ميعرفوش يامنوا السفن ضد محاولات الخطف

20نوفمبر الماضي عقدوا اجتماع لدول البحر الاحمر،حد حس بحاجه؟؟لاء،لان محصلش حاجه

اتمنى انام واصحي ملاقيش قراصنه ف الصوامل والاقى حكومه شرعيه قوية تسيطر على الامور واشوف مسلمين_ف الصومال وغيرها_بيعبروا عن الاسلام بصدق ف كل شئ ف حياتهم

خبر لطيف

2008-10-28T17:14:00.004+02:00

ايها السيدات والساده ازف اليكم هذا الخبر السعيد لقد مر على 29ساعه من غير ولا عطسه محدش يتريق لكن انا بقالى سنين بعانى من حساسيه ف جيوبي الانفيه وكانت كل مدى بتسوء كنت السنه اللى فات قوتى 3عطسه ف الثانيه السنه دى مستوايا اتحسن وبقي 5عطسه فالثانيه كانت الحساسيه دي تعباني جامد مكنتش بطيق اي حاجه لا هوا سخن ولا هوا بارد واى ريحه قويه كانت بتضايقني انا ف الشتا لو مسكت الاكره افتح الباب اعطس لو قعدت على كرسي اعطس لو كنت سقعانه ودفيت اعطس لو خرجت من اوضه لاوضه اعطس كنت بخاف اغير هدومي وكل حركاتى محسوبه حتى الرياضه حرمت نفسي منها لانى هبذل مجهود والا هعطس والموضوع مكانش عطس عادى انا من يجي تلت ايام كنت نايمه على حرف السرير عطست وقعت من على السرير كانت حياتي عطس يصحبه رشح يصحبه انف احمر ومتعور من المناديل يصحبه صداع وسخنيه و وجع ودان وبطن ولما الامور تسوء اوى كنت اخد دوا ادوخ واروح انام ومره اتهورت واخدت دوا قبل ما انزل درس راسي كانت بتقع مني ف الدرس كانت احسن احوالى المشي ف الشارع بما انى بكون مستغطيه كليا ودرجة الحراره مستقره كنت مطنشه المرواح للدكتور سبب انشغالى ولما نقرر اننا هنروح الاقى نفسي بقيت احسن حالا فا اقولهم بلاش بس يوم الحد اللى فات عقدنا العزم ورحت للدكتور مع ماما وعرفت سر كراهية الناس لزيارة الاطباء قالى على كل حاجه ، عدسات لاء مستحضرات تجميل لاء برفنات لاء انسجه صناعيه لاء متعرضش لمروحه او تكيف وسئل ماما جبنا ستاير جديده او سجاد او نباتات واى تغيرات اتعرضت ليها سببت اللى انا فيه دا كويس انه مسئلهاش عن الحيوانات والا امى كانت موتت كل القطط اللى ف شارعنا لانها تدعي انى قطتى الجميله جميله عدتني ومن ساعتها انا كده بس الحق يقال انا طول عمرى مستهتره مش بلبس هدوم تقيله ف الشتا بكره كل الحاجات الصوف انا ماما كانت ما بتصدق انام وتيجي تلبسني بروفل وانا نايمه وكنت ف عز البرد اقف تحت الدش البارد ومزاجى ومتعتى الايس كريم ف الشتاوكنت احيانا اروح ابص ف التلاجه واتفحصها وكنت ف البيت ممكن اللبس حاجه بكم على شورت ويوم ما اللبس بنطلون طويل اللبس تيشيرت او بادي وسنه ورا سنه بقيت بعطس يعتبر بلا انقطاع يعني من الاخر القطه ملهاش ذنب بس تعرفوا مستغربه نفسي وانا مش بعطس الحياه بقت هاديه بقيت اعرف اذاكر واكتب الواجب من غير عطس كنت احيانا بكون بامتحن واخد فاصل عطس يطول او يقصر من كام يوم ماما كانت بتقولى اجيب خيار من التلاجه قلتلها انا!!افتح التلاجه ،ليه يعني عشان ايه دلوقتى بقي بقيت افتح التلاجه واسيب التلاجه مفتوحه واشرب منها حتى ارتوي امى واحنا راجعين زي ما تكون فرحانه فيا لقيتها بتقولى تخيلي كده يوم فرحك لما تتظبطي وتبدئي ف العطس هناخد نغسل وشك قلتلها لاء يعني بعد ما ندفع نغسل اللى دفعنا فيه وبعدين هو المفروض يرضي بالمناظر الطبيبعه ،زمان وانا صغننه مكنتش احب الميك اب خالص ومكنتش متخيله انى ممكن احط ميك اب وكنت سعيده ببشرتي وملامحى زي ما هي بس بقالى يجي شهر كده يعتبر كل يوم اروح الخبط وشي ميكاب وامى تقعد تقولى روحي زاكري احسن قلتلها مانا بعمل كده عشان احس بابتهاج واعرف اذاكر كنت بمر بحاله اشبه بالامان دلوقتى بقيت اعدي جمب الميك اب اللى عندى وابصله بصة حرمان مانا مش هقرب منه حتي اشعار اخر اسبوعين وهرجع للدكتور واشوف هيقول ايه ماما سئلته ان كنت هستمر على الدوا اللى كاتبه او الامور هتمشي تمام قالها هنشوف فا هنستني ونشوف واحنا راجعين البيت ماما دخلت صيدليه تجيبلى الدوا انا لقيت الجو كتمه غير ان كان فى طفله بتاخد حقنه فا قلت لماما انى هسبقها مانا كنت لسا ماخدتش الدوا الحمد لله انا حاسه بفرق لا يوصف مناخيري احيانا بحس انها زعلانه ومستائه لكن من مساء يوم الاحد ف العاشره والنص مساءا وانا من غير ولا عطسه

بعد الغياب

2008-10-16T09:19:00.003+02:00

تعرفوا انى فكرت كتير اكنسل البلوج بتاعى مع انى بحب اعبر دايما عن مشاعري بس هي تقلبات نفسيه وعلى عكس كل قرارتى اللى اول ما لمبة الفكره تنور ف دماغى انفذها من غير تفكير لانى لو فكرت فى احتمالات كتير هتظهر وممكن اتراجع عن تنفيذ الفكره فانا كل مره فكرت اكنسل البلوج كنت بتحجج لنفسي بحجج وادى نفسي فرص واظن انى حاليا مش مستعده اللغيه ابدا حتى لو هتكلم ومحدش هيسمعني او يرد عليا اديني ببعبع وخلاص جهازى الحبيب اصيب بحاله مرضيه مفاجئه وخطيره تانى يوم العيد كنت قاعده عليه قمت اتغدي بعد المغرب_كنت عازمه صاحبتي على الغدا عندنا كمان_وسيبت الجهاز لاختى اتهبل ف ايدها وقعدنا نعالج فيه ونظبط فيها يتدهور اكتر انا ولانى الايام الحاليه مبقتش استعمله كتير بسبب انشغالي ف الدراسه فا متاثرتش اوى لكن اختى المسكينه كانت اعصبها تعبانه ومكتئبه والوضع وصل لمعاها لحد البكاء _او والله العظيم_ انا كنت بمر بحالات حنين جارف ليه بس هو كان بيحبطني لو قلابت منه بعد ما يئسنا من محاولات تنزيل ويندز جديد سواء من الاسطوانات اللى عندنا او من الاسطونه اللى اختى نزلتنى اشحتها من احمد ابن عمنا قررنا نوديه للدكتور على فكره اختى فتحته ودعبست فيه من جوا وشالت الرامات وركبتها تانى وفصلت الراك _مش عارفه زعلها ف ايه_وقعدت تنضف فيه وما كان حاله يزداد الا سوء عمى اخده وداه للدكتور بس احنا كنا عايزين نوديه للمهندس عبد السلام دا راجل خبره وكفاءه وايام زمان ايام ما كان الجهاز بيقطع النفس مننا كنا نبعتهوله يرجع قشطه بس المكان اللى عمه وداه فيه كان شركة كمبيوتر و دول انا جربتهم قبل كده كان ابويا بيصيف وقبلها كان حالف ان لو حصل حاجه للمسكين مش هيتدخل ف الفتره دى انا شيلته هيلاهوب ورحت مع ماما ودناه نفس الشركه دى عملوا اللى بيعملوه كل مره نزلولنا ويندز جديد كانها كانت حاجه صعبه علينا يعني بس المهم انه بيرجع يتكلم مش عارفه ماله اليومين دول يجيب احباط ليه تقيل غالبا وبيعمل ريستارت لو حاولنا نفتح الهوتميل ماسنجر الجهاز المسكين دا كان حصله اللى حصله دا من يجي ६ شهور وجالنا واحد صاحب بابا مهندس كمبيوتر فتح بطنه_انا واختى كنا فاتحينها مسبقا _وبضفه_مع انى انا واختى مبخلناش عليه بحاجه ولاننا معندناش بلور انقادنا لنصيحة ماما واستعملنا السيشوار_وقبل ما صاحب بابا ينقذه كان طلع ريحه جامده ناهيكم عن الصوت اللى بيعمله كل ما اعصابه تتعب ولان الحرمان وحش اللى كان بيهون عليا ظروف الجهاز بتاعى انى كنت بطلع اتسول انترنت من بنات عمى بس النت بتاعهم ف المرتين اللى فتحته كان تقيل اوى سد نفسي دعواتكم لجهازي بدوام الويندز والانترنت لانى طالبه مثاليه جدا جدا فانا مروحتش المدرسه ولا مره اللهم الا مره كنت ناويه اروح استلم الكتب وادفعلهم المصاريف بس الناس نورونى وقالولى انا اولى بالفلوس وكان معاهم حق فا رجعت خاوية الوفاض بس انا نفسي اروح المدرسه بحبها اوى الواحد مش بيحس بقيمة الشئ الا لما يفقده مفتقده حصص الرياضه و منظر الاراضي اللى جمب المدرسه مفتقده الطريق اللى كنت بمشي فيه قرر اروح ف ايام كتير بس مكنتش بقدر وانهارده كان اخر يوم صحوني الساعه7والمفروض اكون هناك 7ونص وامى قعدت جمبي تقولى ملاحظتها مش هتكوي هدومك دا منظر تروحي بيه هتعملى ايه هناك خليكي احسن اتخنقت بس متكلمتش وبدءت اجهز حاجتى ويتضح انى كنت عاينه هدوم المدرسه_اليونيفورم يعني_من غير ما اغسلها ماما لمحت الكم شكله مش نضيف مع انى محستش بكده يعني وقالتلى هتروحي بالمنظر دا متكلمتش جيت اقفل زراير البلوزه حسيت ان الوضع مختلف انا وزنى زاد ف الميزان بس مش باين عليا ومحستش بفرق ف هدومى التانيه مش عارفه ايه جرى للبلوزه دي يمكن جالها مزاج بعد سنتين تكش ساعتها جالى احباط فوق احباطى ورجعت الهدوم الدولاب وجيت فتحت الكمبيوتر وبعد ما زلنى وفى اثناء قرائتي لمجموعه قصصيه ليوسف السباعي كتبت البوست دا واحب اقولكم هتخلص من احباطاتى and I will be back सूऊऊऊऊन

طقوس رمضانيه

2008-09-04T11:57:00.006+02:00

رسمتها ف لحظة تجلى ف درس العربي تانى يوم رمضان

الواحد اخدله يومين على ما حس ان رمضان جه مع انى كنت مستنياه بس لما جه قعدت شويه على ما استوعبت انه وصل

الحمد لله رمضان دا معنديش دروس قبل ف الفطار والواحد يحمد ربنا تلت مرات عشان تلت حاجات اولا انى باجي العشا وببدء اهنج وافضي شحن ما بالكم بقي لما يكون الشحن اللى فيا بيهضم ثانيا انى لاسباب غير مفهومه وغير معلومه مابفهمش اوى بعد الاكل لما باكل بكتئب وبهبط والدنيا بتتقفل معايا و الحمد لله انى هقدر اصلي التراويح كل يوم

وانا مهما حصل ومهما كان لا اتنازل عن صلاة التراوبح ف مجمع الرحمن

من وانا ف الابتدائي انا فاكره اول مره رحت اصلي مع ماما هناك كان معايا بسنت بنت عمي هي اصغر مني بسنتين وما شاء الله منظرنا كان ف يؤهلنا لدخول الديسكوا مش الجامع كنا احنا الاتنين لابسين استرتش انا جينز وهيا قماش ولابسين بلوزات قصيره والطرحه موجوده اثبات حاله بس حاليا الحمد لله الوضع اختلف امى كانت بتصلي معايا هناك واختى احيانا بس اختى بقت بتصلي ف جامع جمب البيت وامى بتضطر تقعد تصلي ف البيت

ف الغالب بتاخر على الصلي شويه بس بلحق اول ركعه

كان المعتاد ان الجامع بيكون زحمه ف الايام الاخيره من رمضان كان ماشاء الله متكربس من اول رمضان انا دخلت الجامعه بمعاناه والواحد واقف محشور ،كل رمضان بكون صداقات بريئه مع اطفال الجامع السنه اللى فاتت كان صاحبي عمار السنه دى لسا معرفتش اسم صاحبي الجديد بس واد سكر

كل يوم وانا رايحه الجامعه اكون ف نص الطريق والاقى شيخ جامع بيقول ركعة الوتر اثابكم الله اتخيل انى اتاخرت والمشوار راح على مفيش بس اوصل هناك الاقيهم ف اول الصلي عشان الجوامع التانيه ماشيه على نظام جامع المسافرين

____

ساعة السحور بقي بقضيها ف البلكونه بحب اتفرج على الدنيا وهي فاضيه_الدنيا من البلكونه لا تتجاوز شارعنا_بيبقي الجو جميل اوى بليل والحلو ان الدنيا بتبقي ضلمه فا بطلع البلكونه من غير ما اغطي شعري واقعد على السور بيبقي احساس مبهج

مامتى حبيبتي متعوده تنكد عليا ف اكل السحور ف الغالب مش بيكون على مزاجى بس بقول لنفسي استحمل احنا ف ايام مفترجه مش وقت شكل مع ماما تصدقوا البيض المسلوق بقي ضيف دايم على السحور والبيض المسلوق اكتر شيء بشمئز منه ف الاكل ببقي ناويه اكل حاجات تانيه بس اكل البيض والدنيا تقفل معايا واقعد ساكته لانى لو اتكلمت هيبقي صباح سعيد بزياده اهى امى واستحملها زى ما بتستحملنى

بحب اقعد ف البلكونه اشوف الناس وهي رايحه وراجعه من صلاة الفجر وبستمني اه والله بستمني من اعماق قلبي دا يحصل طول السنه مش ف رمضان بس

ساعة الفجريه دي بتحرك جوايا رغبه مجنونه مش قادره احققها ومش قارده اتخلى عنها نفسي انزل اجرى ف الشارع حافيه والارض منديه ومفيش احلى من لحظات الشروق بحب اراقب شروق الشمس منظر باعث للتفاؤل _______

وانا صغننه كان فى عمو مسحراتى بيلف ينادى وكنت ف الفتره دى مش بصوم ولما بدءت اصوم بانتظام ماما كانت بتصحيني قبل الفجر بشويه تاكلنى كنت بطلب منها دايما تصحيني لما لمسحراتى يجيي احيانا كانت بتحاول واحيانا كنت بصحي واحيايين مكنتش بقدر

حاليا والحمد لله مبقاش قى عمو مسحراتى لدرجة انه هاين عليا اشتغل مسحراتى انا ___________

رمضان ميبقاش رمضان من غير الفوانيس والشراشيب

بيتنا وهو مدلع وبلكونتا ف النص مضلمه

كنت بعمل انا و ولاد عمى وبنات عمى و ولاد الجيران شراشيب بس دا زمان ايام ما كنت بلعب معاهم ف الشارع_عادي يعني الواحد ميبقاش عاش طفولته لو ملعبش ف الشارع_لما كبرنا بقي العاده انقطعت شويه بس مؤخرا الشباب اللى ف الشارع بيتكفلوا بالمهمه دي اليوم اللى قبل العيد لقيت عمي علق فوانيس ونور على بلكونته وتانى يوم الصبح لقيت الشارع مليان شراشيب بعدها بيوم عمى التانى حط فانوس ف بلكونته

اما انا بقي مجابوليش فانوس دا حتى عمو الشحات _دا اسمه والله مش قصدي حاجه دا اغنى من اللى جابوني_حاطين فانوس ف بلكونتهم وحاطين عليه ورد صناعي كده نصيب شارعنا تلت فوانيس كان نفسي اجيب فانوس بس المشروع فشل بسبب انشغالنا ف شوية حاجات مكانش الجو مناسب لرغباتي الطفوليه دى قلت لماما عايزه فانوس يدي لفوانيس الشارع بالشبشب وان شاء الله هيحصل بس رمضان الجاى

__________

ساعة الفطار لازم افطر على تمره واشرب مايه وممكن عصير او مياه غازيه او خروب واصلي المغرب وبعدها افطر وف الغالب مش باكل اوى ف رمضان اقل من الايام العاديه المعده بتكون معندهاش استعداد تهضم يعني هي فاضيه من الفجر اجى اشغلها على اخر اليوم

جو الصيام بياثر عليا شهر كمان بعد رمضان بفضل مش مقبله على الاكل دا غير انى بصوم بعد رمضان عالطول

_______

مخرجتش من البيت اول يوم من رمضان مكانش عندي دروس بس تانى يوم وانا رايحه الدرس بعد العصر لقيت الناس امم طالعه من الجامع وفارشين حاجات يصلوا عليها ف الشارع اكيد انتوا عارفين منظر الجامع بيكون عامل ازاى ف غير رمضان

لو شوفت شخص بياكل ف الشارع ف رمضان ،ايه الفكره اللى هتيجي ف دماغك ؟؟اكيد انه مش مسلم

بس معلش يعني فى رجاله وشباب بياكلوا ف الشارع ف رمضان وهما مسلمين ومنهم اللى بيدخن وعايش دور الصايم

يكون شعورك ايه لما تبقي ماشي سواء الصبح او بليل وشايف الشباب لسا بناطيلهم واقعه منهم وكل واحد ماسك موبايله ومشغل الاغانى عليه مش مكتفي بانه يسمع لاء يسمع الناس كمان

ويكون شعورك ايه لما تلاقى البنت الى كانت بتحط ميك اب وبتلبس لبس مش ولا بد لسا على حالها دا ف رمضان ويكون شعورك ايه لما تلاقى البنت اللى كانت بتلبس مش ولا بد تيجي ف رمضان تلبس عبايه سواء كانت العبايه واسعه ولا ضيقه بس المهم ان البادى والبنطلون بقوا عبايه ؟؟

يكون شعورك ايه لما تكون رايح او راجع من الجامع وشباب الغد المشرق_ال مشرق ال_قاعدين على القهاوى يشيشوا ولا لامين الشله وسرانين ف خيمه شيطانيه_اللى بيقولوا عليها رمضانيه دي_؟؟

يكون شعورك ايه لما تشوف واحد ف نهار رمضان بيقول لواحد ف الشارع وبعلو صوته هفطر عليك؟؟

يكون شعورك ايه لما تشوف واحد عمال يسب ويلعن ويدعى بعدها انه صايم ؟

ويكون شعورك ايه لما تلاقى شله لطيفه قاعده تتكلم على المسلسل الفلانى اللى على القناه الفلانيه بدل ما يستغلوا رمضان ف العباده على اعتبار ان رمضان اقوي موسم للمسلسلات مش موسم عبادات؟؟

بكون شعورك ايه لما حبيبك او حبيبتك يركب الوش الخشب معاك ف رمضان على اساس اننا ف رمضان يعني وبقيت السنه ايزي؟؟

وبكون شعورك ايه تجاه شخص عنده رمضان زي شعبان زي اى شهر و اى يوم؟؟

ويكون شعورك ايه لما تشوف طفل صغنن ماشي ف الشارع ياكل ويشرب كل ما لذ وطاب واشبع واسمن ؟؟

هقول انا شعورى ف الموقف دا ،شعور بالفتنه والاغراء شعور مثير للمعده والبنكرياس

وكل سنه وفوانيسنا صيني وياميشنا سورى

2008-08-24T08:40:00.002+03:00

مش بتكلم عن شيء الا لما يمس احساسي اوى والحمله دى مست احساسى وتوافقت مع افكار كتير بتدور ف دماغى

اظن ان 70%من سكان العالم عايشين تحت خط الفقر يعني مش كل يوم بيلاقوا اللى يسد جوعهم _الحمد لله اننا مش منهم_النسبه ان مش متذكراها تماما بس هي تقريبا كده و دا معناه ان 30% من البشر عايشين عيشه ادميه والباقى عايشين عيشه غير اداميه وضع يفترض انه يدفع كل غني انه يخجل من فقره

خلونا نتكلم عن مصر

مصر ام الدنيا اللى كانت بتاكل العالم اللى قال عنها هيردوت(اذا جاع العالم اطعمته مصر واذا جاعت مصر لما يطعمها احد)ياعيني عليكي يا مصر

كرهت الخروج من البيت

منظر المتسولين ف الشوارع بيوجعني ف الطريق للمدرسه و الدرس واى مكان بروحه بحس بالخجل من نفسي ومن الناس كلها ،هو الناس دول ملهمش حق عندنا

فا مصر كل يوم الغني بيزداد غني والفقير بيزداد فقر مش هتكلم عن الحراميه اللى ف البلد لانهم مشهورين اوى رشاوي وقروض واختلاسات وكوسه وغش وحاجات فاسده ومن دا كتير

خلونا نتكلم عننا يا ترى احنا بندي الناس دول حقهم ويا ترى اساسا هما يستحقوا الاحسان ولا نصابين و واخدينها طريقه للكسب السهل

اى مليم بيتصرف ف مصر بيكون مصدره اما الضرايب او المعونه الامريكيه و المعونه بتتصرف على مزاج امريكا يبقي الضرايب اللى احنا بندفعها تتصرف على مزاجنا بس حكومتنا العبيطه واغراضها الدنيئه بتضيع فلوسنا على حاجات ملهاش لازمه

وف مصر ام الدنيا اللى معاه فلوس بياخد اكتر من حقه واللى معاهوش مبياخدش حقه بنظام قانون الغابه ف الغابه البقاء للاقوي و ف مصر البقاء للاغني هو مش من حق كل مشرد بيت يحميه و هدوم نضيفه تغطيه ومصدر يوفرله اللى يسد جوعه

المحرك اللى دفعنى لكتابة الموضوع دا كان اللى قرئته عن حملة بؤجة الخير اللى للاسف معرفتهاش الا بعد ما اتعملت وحتى لو كنت عرفت من البدايه مكنتش هعرف اشاركهم بس الناس المحتاجين مش ف اسطبل عنتر بس ،ممكن يكون الشخص المحتاج دا قريبنا او جارنا كان فى كلب صغير قاعد ف مدرستي وكنت بجيبله لنشون ااكله ليه المدرسين قعدوا يتريقوا عليا ويقولوا الناس مش لاقيه تاكل وانتى بتاكلى الكلب لانشون معاهم حق بس الكلب دا مش روح انا لو لقيت انسان محتاج لمساعده اقدر عليها هقدمهاله و دا ميمنعش انى اعطف على حيوان مفيش قدامه سبيل لانه يوفر اكله فقر وتشرد يعني انحراف يعني اجرام يعني مخدرات يعني سرقه يعني امراض مجتمع

الفقير المحتاج لو ملقاش حد يساعده هيتحول لشخص ناقم على المجتمع كا كل سيدنا كان بيستعيذ من الكفر والفقر متخيلين الربط بين الكفر والفقر فى ناس ف كل مكان بتغير دينها ف مقابل انها تعيش حياه انسانيه مجرد حياه ادميه

فى جمعيات اهليه اغراضها خيريه كتير ف مصر منها اللى بيقدم خدمات اجتماعيه ومنها بيقدم ذل اجتماعى مش عارفه ف النهايه يا تري الجمعيات دي بتقوم باللى تقدر عليه ولا مقصره الواقع بيقول ان فى حاجات كتير المفروض تتعمل

انا مش عارفه انا بقول ايه بس باختصار انا مضايقه انا مش سعيده

انا عايزه كل مريض يلاقي دوا وكل عريان يلاقي شيء يستره وكل جاهل يلاقى تعليم ينوره وكل جعان يلاقي اللى يسد جوعه وكل مشرد يلاقي بيت يحميه وكل محتاج يلاقي مساعده توفرله احتياجاته ومتجرحش كرامته دا حقهم علينا و واجبنا تجاههم لو كل واحد قعد خمس دقايق مع نفسه يفكر ممكن يعمل ايه هيلاقي اكيد حاجه يعمله

ساعات بنشوف متسوليين ف الشارع ومش بنرضي نديهم قروش ممكن ندفعها بقشيش ف اي مكان لشخص ليه مصدر دخل من الاساس وبندعي وبنبرر تصرفنا اننا منعرفش اذا كانوا واخدينها مهنه ولا محتاجين فعلا وفيهم كتير بيستغلوا سذاجة الاخرين ويعملوا كده

مدرستى ف المدرسه اللى كانت بتديني ف المدرسه انجلش حكتلى على موقف اتعرضتله ف المنصوره ف شارع الجلاء تحديدا واحده جات طلبت منها فلوس_انا مش فاكره روايتها بالتفاصيل_ولسبب ما مدتهاش حاجه الست دى مسكتها شتيمه وكانت هتضربها عشان تاخد منها فلوس بالعافيه !!!نو كومينت

انا شخصيا بكون ساعات ماشيه ف الشارع يجي عيل صغير يقولى عايز فلوس اجيب سندويتش ف الغالب بديلهم فلوس بس الموقف دا حصل وانا مع ماما مره ومسجعتنيش على تصرفى وقالتلى لو حد عمل معاكى كده قوليله انك هتروحى معاه يجيب اللى هو عايزه وتحاسبي عليه وكان ليها وجهة نظرها السليمه ان بعض الاطفال دول ان مكانش كلهم بيكونوا مش محتاجين و منهم بياخد الفلوس دي يجيب بيها سجاير يعني الواحد يبقي نيته خير ويعمل غصب عنه حاجه وحشه

ماحنا صحيح مش عارفين الناس اللى بنديلهم الفلوس دي بيعملوا بيها ايه بيتعاطوا بيها مخدرات ولا بيشتروا بيها دوا بيدفعوا بيها ايجار ولا بيشتروا حاجات ملهاش لازمه

كان فى واحده ماما عرفتها بطريق غير مباشر كانت عراقيه ومتجوزه واحد مصري و جات مصر بعد اللى حصل ف العراق وجوزها المصري الندل مكانش بيصرف عليها _عادى_ وكانت عايشها هى واولادها الاربعه على الاحسان و الصدقه بالاضافه لان بناتها كانوا بيشتغلوا ماما دخلت حمام بيتهم لقت فيه انواع شامبوا اكتر من اللى عندنا غير شامبو القطه

ساعات بتطرق معاهم ف البيت لكلام عن المتسولين وكده وماما وبابا بيقولولى لو شفت حد محتاج اكلمه واعرف اقدر اوصله ازاى ويحاولوا يوصللهم مبالغ معقوله تناسبهم لو كانوا يحتاجوا مش من النوعيات اللى بعد ما تموت بيكتشفوا الالاف اللى كانوا بيمتلكوها عشان الواحد لما يطلع من جيبه قرش يبقي عارف انه راح للى يستحق

بس مظنش ان الافكار دى عمليا تنفع على الاقل انا مش هعملها ف يوم

ولو كنت حاولت اعملها من اكتر من سنه على كوبري طلخا _كوبري العشاق_كنت راجعه من المنصوره ماشي وشوفت بنوته صغنونه بتبيع مناديل على الكوبري وقفتني اخد منها مناديل ساعتها كان معايا شوية فاكه طلعتهم اديتهم ليها من غير ما اعرف كانوا اد ايه مبلغ زهيد مايجيش خمسه جنيه جات تديني علبة مناديل مرضتش اخدها وكان معاها ورده طلبتها منها فا ادتهالى واتكلمت معاها شويه شوفتها بعدها مرتين وكلمتها عرفت ان اسمها دنيا من السنبلاوين وكانت رايحه اولى ابتدائي كانت متحمسه لانها هتروح المدرسه كانت بتيجي مع والدها يبيعوا مناديل من الصبح ويرجعوا بليل ،احنا اتكلمنا اكتر من كده بس مش فاكره كل كلامنا

لما حكيت لاهلى عنها نصحوني معملش كده تاني ،قلتلهم فيها ايه دي طفله قالولى هي طفله مفيهاش حاجه لكن متعرفيش اللى وراها عامليين ازاى

مشوفتش دنيا من شهور بس مش هنسي بشرتها السمره وشعرها الاحمر كنت بشوفها من فتره طويله وانا معديه على الكوبري بس بكون راكبه

يارب تكون رايحه تانيه ابتدائي دلوقتى

وهفكر نفسي وافكركم بالحديث اللى سيدنا محمد قال فيه (احب الاعمال الى الله سرور تدخله على قلب مسلم تكشف عنه كربه او تقضي عنه دينا ولان امشي مع اخ لى فى حاجه احب الى من اعتكافى ف مسجدي هذا شهرا)صدق رسول الله صلي الله عليه وسلم

عن الامومه اتحدث

2008-08-04T17:59:00.006+03:00

لا اعلم ان كانت البقره اروع الامهات ليتخذها القدماء المصريون رمزا للاله حتحور الهة الامومه والحب والجمال ولكن من وجهة نظرى الشخصيه ارى الحيوانات فى امومتهن افضل من بني البشر.

لو اصل لهذه النتيجه من فراغ لكنها نتيجة ملاحظتى لقطة احتلت منزلنا كرها لتلد فيه ثلاث مرات فى فتره تزيد عن العام لم اكن افكر فى امر الامومه حينها وكنت اظن قبل ذلك ان امى هى افضل ام ف الدنيا وكنت كثيرا ما اقول لها (انتى احلى ماما ف الدنيا ) لكن عند متابعتي لقطتي _الجميله_ جميله_ والتى اخترت لها هذا الاسم لكونى لم اجد اسما يناسبها اكثر من ذاك_ وجدت انها افضل من امى ولن ليس للقدر الكافى بان اعرض عليها ان تتبنانى ।

لقد رئيت من هذا الحيوان صبرا واثارا و محبة اظنها تفوق ما يقدمه البشر بالاضافه لتعجبي من ذكائها واساليب تعليمها لاطفالها يوما بعد يوم وحقا شيء يثير العجب معرفتها ما يجب عليها تعليمهم اياه وكيفية القيام بوظيفتها ومتى تكون كل خطوه ।

كنت كلما رئيت تصرفا جديدا من قبلها هى واطفالها اشعر بسعاده بالغه ، مشاهد تدعوا للتفكر فى عظمة الخالق

كانوا فى نطاق العائله يمازحوننى قائلين بان هؤلاء القطط اطفال ف البدايه شعرت بالضيق واقول لهم (هو انا هخلف حاجات من دى) ولكن مع تكرار الجمله راقنى الامر وفى الحقيقه كنت اشعر برابطه قويه بيني وبينهم ربما كانت محض خيال او بمعني اصح محض مصادفه فلقد كانوا اطفال لا يختلفون عن بني ادم وهم اطفال كثيرا ينامون معظم اليوم ، يبكون حينما يجوعون او يفتقدون امهم ، ينامون ملتصقين يربطهم محبه اخويه ، يلتمسون حنان امهم عندما تكون بجوارهم ، يحاولن لفت انتباهها طول الوقت ، لا يتورعون عن ازعاجها وايقاظها من نومها دون غرض ،يلعبون ،يحاولن اكتشاف العالم من حولهم ، يضعون كل شيء فى افواهم حتى ان كان اصبع يدي ।

اتذكر يوم فتحوا عيونهم كانت امهم مريضه يومها وكانوا فى قمة الجوع بكيت خوفا عليهم كثيرا لمدة ثلاثة ايام وحاولت اطعامهم وعندما فقدنا الامل فى عودة الام المريضه لارضاع اطفالها بدءنا ننتظر وفاتهم ولكن فى احد المرات الكثيره التى ذهبت لاطمئن عليهم وجدتهم بين احضانها وشعرت حينها بان الله يحبني او ربما يحبهم هم ولكن ما لا شك فيه الام تختلف عن غيرها فما كان هجرها لهم الا بسبب مرضها خوفا عليهم منها _قليلون من يفهمون معنى ان نضحي بهم من اجلهم _।

2008-05-28T10:07:00.005+03:00

مانتاش اد الحب يا قلبي ولا اد حكاياته
ليه عايزني من دلوقتى احكيلك رواياته
***
بكره يا قلبي تكبر والحب هتعرفه
من غير كلام هتلاقى عنايا بتوصفه
***
وهتبتدي الحكايه بكلمه صغننه
حكايه جديده خالص من تاليفي انا

__________________________________

صدقنى خلاص صدقت ان انا حبيت دلوقت
ومكنتش اعرف قلبي هيحبك كده
***
كنت فين انت وكل الحب دا
وليه سايبني لوحدي طول العمر دا
***
بحبك موت....
***
اخاف ليه ومن ايه
دانا معايا حبيبي و دا كفايه
واقول ايه
هو الكلام هيوصف ايه
***
حبيبي انا حاسه معاك بالامان
***
خليني معاك اوعي تسيبني حبيبي انا نفسي ارتاح

___________________________________________

بشوف ف عنيك كلام ملوش غير معني واحد
ان النهايه لكل حاجه مابينا جايه
فاكر زمان ايام ما كان احساسناواحد
***
هتسيبني خلاص وانا هرضي محدش مات م الوحده وعادى
***
حبيتك حب محدش حبه لحد مفيش
وبرغم الحب اللى انا حبيته محبتنيش
***
كان لازم اهواك
علشان انا قلبي طيب وانت حبك هلاك

______________

مضعفتش قصاده ومشافش دموع عنايا مع انه واجعلى قلبي

______________

ما خلاص ايه جابك تانى
ارتاح وانسانى واللى هيجي منك والله مانيش عايزاه
***
حبيبي انت اللى بالبعد بادى
و دلوقتى عادى انى اقسي عليك
كل اللى هاين عليا تشوفك عنايا ولا تحن ليك
***
دانا لو بموت تعرف ورحي كانت فيك
اموت ولا ارجع ليك ولا يوم تشوفنى اضعف
***
ما خلاص قلبي اتجرح....

صباحوا حرقة دم

2008-05-02T09:24:00.002+03:00

الواحد صاحي من الفجر صلي وقال الاذكار وقرء شويه ف المصحف واستعان على الشقي بالله وقعد يذاكر وشويه زهقت وقلت افتح النت شويه ابص على الدنيه اعدل مزاجى بحاجه حلوه عشان ارجع للشقي اجى اول حاجه تتفتح ف وشي الهوم بيدج واول عنوان تيجي عيني عليه يحرق دمى لم ولن اتراجع عن اننا شعب معقد نفسيا او بصراحه اكتر شعب مريض نفسيا العنوان كالتالى(192 مليون جنيه ميزانية افلام الصيف)الموقف دا مش اول مره يحصل معايا واسمع عن التكلفه الفظيعه للحاجات الفظيعه دي بس قبل كده كان خبر عن تكلفة مسلسلات رمضان بس ايامها مكانش الشعب بيعمل اضراب عشان مش لاقي رغيف العيش مكانش فى قضيه ف المحكمه لناس باعت لحمة حيوانات وحمير ميته كبديل عن اللحمه الطبيعيه عشان الناس متنساش طعمها ايامها مكانش اهلنا ف غزه متحاصرين مش لاقين لا اكل ولا شرب و كهربا ايامها مكنتش اعرف ان تلت اربع الشعب تحت خط الفقر سبع افلام هيتعرضوا ف خلال شهرين يتكلفوا 192 مليون جنيه هما اه 192 مليون جنيه والجنيه المصري ميسواش كتير يعني بس اسمهم 192 مليون وانا مشوفتش ف حياتى الاخ مليون دا بس انا اعرف انه كبير الكام مليون دول ياكلوا كام جعان ويسكنوا كام مشرد ويطوروا كام مدرسه وجامعه وينضفوا كام مستشفي حد يقولي بنستفيد ايه من الافلام دى اللى بتدور ما بين عنف وجنس وسخافه وانحطاط اخلاقى هو اه الناس اللى معاها ملايين بتبعزقها على الحاجات دى هتكسب من وراها ملايين تانيه من مال الشعب ،الشعب اللى مش لاقى رغيف عيش صالح للاستخدام الادمى فلنفرض جدلا ان الافلام حلوه ولزيزه ومفيده وبتنمي الوعي القومي و وراها حكمه وفكره و ليها رساله مش فى ف الدنيا اولويات؟؟؟؟ ولا انا مالى حاجه تحرق الدم

ايها المواطن لا تاكل الفسيخ ..الفسيخ شيء قاتل..الفسيخ شيء قاتل

2008-04-26T12:08:00.007+03:00

فاكرين الفيلم اللى انا مش فاكراه بس هو بيتعرض ف الغالب ف عيد الشرطه وبيقولو فيه لا تشرب الدواء الدواء فيه سم قاتل على فكره الفيلم دا ينفع خيال علم او اسطورى من بتوع العصور الوسطي لكن ف الفتره اللى هو اتجسد فيه انا محبش اتكلم عن فتره انا معشتهاش

المهم خلونا ف الفسيخ
لما شم الفسيخ بيقرب بيبقي موسم مش لبتوع البيض والفسيخ بس لا دا للمسيحين بتبقي فتره اعياد عندهم والدكاتره و وزارة الصحه الكل بيعيش ف الفتره دي

والموضوع دا من الاهرام بتاريخ انهارده
برغم ما أثبتته الدراسات والأبحاث العلمية من وجود بعض الطفيليات والبكتيريا الممرضة في أسماك الفسيخ‏..‏ فإن الكثير منا مازال يحرص علي تناولها دائما خصوصا في عيد شم النسيم مع البصل الاخضر والخس والملانة‏(‏ الحمص الاخضر‏)‏ ويتجاهلون أخطاره التي ينبهنا إليها الدكتور سعيد شلبي أستاذ ومستشار الباطنة والكبد بالمركز القومي للبحوث ويقول إنها تتمثل في الطريقة التي يصنع بها الفسيخ حيث تترك الأسماك في الخلاء حتي يحدث لها بعض التحلل والانتفاخ وهو ماسمي بعملية التفسيخ والتي قد يصاحبها حدوث تلوث بالبكتيريا الممرضة عن طريق الذبابات وفي بعض الاحيان يتم التلوث ببعض أنواع اخري من البكتريا الخطيرة مثل الكلوستريدم يوتولينم الذي يؤثر علي الجهاز العصبي ويؤدي للوفاة‏,‏ إضافة إلي حدوث نوبات إسهال لفترات تتراوح بين‏12‏ و‏72‏ ساعة‏,

يصاحبها ضيق في التنفس وحدوث شلل للعضلات‏..‏ ايضا إذا كانت هذه الأسماك مصابة ببعض الطفيليات والتي قد تنتقل للانسان اذا لم يتم التمليح لفترة كافية‏..‏ وهذا يحدث كثيرا في شم النسيم نتيجة للطلب المتزايد علي الفسيخ فيتم عرض كميات كبيرة منه دون التمليح الفترة الكافية‏(3‏ أسابيع‏)‏ وهنا يحدث مغص وقي وقد يسبب ايضا تليفا في صمامات القلب‏,‏ أو حدوث جلطات بالأوعية الدموية للمخ‏..‏
‏
*‏ وأسأله‏:‏ ماهي الشروط الصحية لفسيخ آمن بلا متاعب مرضية؟؟

ـ يجيب د‏.‏ سعيد بأن هناك قواعد عامة يجب اتباعها عند شرائه وكذلك قبل تناوله‏,‏ وأثناء أكله أيضا من أهمها الآتي‏:‏

ـ أن يتم شراء الفسيخ من مصادر آمنة ونظيفة‏,‏ والتأكد من أن عمليات التمليح قد تمت في براميل خشبية وليس في صفائح مغلقة حتي لاتتوفر البيئة الهوائية التي تساعد علي تكاثر ميكروب الكلوستريديم يوتولينم الخطير التي يسبب التلوث الغذائي لطعام الانسان ايضا‏.‏
‏
**‏ يجب عصر الليمون علي الفسيخ حيث إن هذا الوسط الحامضي يكون غير مناسب لتواجد البكتيريا‏..‏
‏
**‏ يمكن قلي الفسيخ في الزيت‏,‏ أو تجميده قبل استخدامه لمدة‏48‏ ساعة لقتل ما به من طفيليات خصوصا إذا كان قد تم تمليحه لفترة غير كافية
‏
**‏ عدم تناول كميات كبيرة منه لمحتواه المرتفع من الملح والذي يضر مرضي القلب والكبد والكلي وغيرهم وعموما يحذر من تناول الفسيخ بالنسبة للمرضي الممنوعين من الملح والبروتين الحيواني‏.‏
‏
**‏ الحرص علي تناول كميات كبيرة من الخضراوات بجانب الفسيخ مثل البصل والترمس والخس والملانة والتي تساعد في التخلص من الملح الزائد حيث تقوم هذه الخضراوات بامتصاص الملح الزائد وطرده في البراز مع مراعاة غسيل تلك الخضراوات جيدا مع استخدام الخل لتجنب الدودة الكبدية أو الاصابة بطفيليات وميكروبات اخري‏..‏

مع العلم بأن هذه الخضراوات ايضا لها فوائد أخري مهمة فمثلا البصل الاخضر به مادة تشبه الانسولين تفيد مرضي السكر وبه مادة مضادة للأكسدة تخلص الجسم من الشقوق الحرة وقاتل ايضا للبكتيريا‏,‏ أما الترمس فيفيد مرضي السكر ايضا الذين لايعتمدون علي الانسولين كما يحتوي علي بروتين نباتي‏,‏ وبالنسبة للخس فيحتوي علي فيتامين هـ المفيد للجميع‏.‏
‏
**‏ وفي حالة حدوث أي اعراض للتسمم الغذائي مثل نوبات الإسهال أو الأعراض التنفسية والعصبية‏..‏ فيجب الاسراع فورا بالاتصال بالطبيب لأخذ العلاج المناسب أو مضادات التوكسينات إذا لزم الأمر‏.‏

_______________________
مع تجاهل الطعم المقزز والريحه المقرفه بتوع الفسيخ الواحد يعرض نفسه لكل دا ليه

اغلب المشايخ بيقولوا ان الاحتفال بشم النسيم حرام على اعتبار انه مستحدث وكل مستحدثه بدعه وكل بدعه ضلاله وكل ضلاله ف النار او بمنظور تانى ان عيد الربيع عيد فرعوني و امتد على مر مئات السنين لينا والبعض بيقول انه مرتبط باله الفراعنه واللى يقول انه تبع المسيحين وان العيدان الوحيدان اللى مباح للمسلم الاحتفال بيهم هما الفطر والاضحى

من وجهة نظرى الشخصيه اللى طبعا لما تتحط قدام وجهة نظر اى شيخ تبقي تحت الجزمه ان ما ينطبق عليه انه مستحدثه يبقي بدعه وضلاله ف النار دا لما يكون شيء مستحدث فى صلب الدين مش عاده اجتماعيه
وان كان الرفض للاحتفال باليوم دا لانه متبني من غير المسلمين ودا يعتبر تشبه بيهم
فانا هنا افتكر حديث الرسول اللى قال فيه الحرام بين والحلال بين وبينهما امور مشتبهات فاجتنبوا مواطن الشبهات..فا من هنا المفروض المسلم يحتاط لدينه والربيع تلت شهور الواحد ممكن يستمتع فيهم بيه وبجماله بدون تقيد بيوم 28 ابريل على الاقل هنستمتع بيه بدون زحمه و ريحه وحشه

a>
وانا مش عارفه ايه العلاقه بين الرنجه_احيانا بستلذها_ والفسيخ و الفطير_دا حبيبي وكفاءه_ والبيض المسلوق_عدوي اللدود_ والاحتفال بالربيع وجمال الربيع ويا حلاوة الربيع

هو احنا مينفعش نخرج ونتفسح ونتمتع بجمال الربيع من غير ما نشوه البيئه حوالينا ونضر نفسنا والفسيخ بيتاكل معاه عيش كتير واحنا شعب مش لاقى رغيف العيش فا نوفر على نفسنا بقي

وبكرر ندائي تجنبا للخسائر اياك والفسيخ، الفسيخ لفسيخ
ولو حتى شاركنا ف اي مظهر من مظاهر اليوم مش لازم يبقي بنية الاحتفال بعد الربيع او شم الفسيخ زي ما بحب اسميه

حاسه ان البنت دي نفسها تحدف حد بالبيضه اللى ف ايدها

ايميل جالى

2008-04-19T12:44:00.003+02:00

دلوقتى بفتح الان بوكس بتاعى لقيت فيه الرساله دى وبما ان معنديكش كونتاكتس ابعتلهم الايميل دا قلت انشره على المدونه من اجل تحقيق اقصدي انتشار واقصي منفعه

السلام عليكم

عزيزى المدون

انت مدعو للمشاركة معنا فى سلسلة مدونات مصرية للجيب

الفكرة:
السلسلة ببساطة هى عبارة عن مجموعة من الاعمال التى تضم كوكتيل من التدوينات المختلفة المتنوعة لمختلف المدونين و تسوف تصدر فى شكل سلسلة كتب تحت اسم مدونات مصرية للجيب و قد تم الاتفاق مع دار اكتب للنشر لاصدار هذه السلسلة مع حفظ كامل حقوق الملكية الفكرية و المادية لكل المدونين المشاركين باعمالهم فى السلسلة و سوف يصدر اول عدد فى شهر مايو القادم بأذن الله

من نحن:
نحن مجموعة من المدونين نرغب فى ان تخرج من حيز مدوناتنا الى سلسلة مكتوبة و منشورة حيث تصل افكارنا و كتاباتنا الى قطاع اكبر من الناس و اصحاب الفكرة الاصليين هما المدون احمد مهنى صاحب مدونة مزاج و المدون احمد البوهى صاحب مدونة انكسارات

كيف تصل الينا:
للتعرف على الفكرة بتفاصيل اكثر و كيف تستطيع المشاركة بافكارك و تدويناتك يمكن ان تصل الينا من خلال الطرق الاتية:

الجروب على الفايس بوك:

http://www.facebook.com/group.php?gid=13820826455

مدونة انا و صاحبى:

http://sneen.blogspot.com

كيف ترسل اعماللك للمشاركة معنا:

للمشاركه ترسل الاعمال على الايميات الموضحة بالاسفل و نرجو كتابه مايلي علي الايميل المرسل لنا :

1- عنوان الميل تصنيف البوستات الخاصه بك التي تريد ان تشارك بها ادبي – اجتماعي – سياسي او انك لاتريد تصنيف بوستاتك و يكتب اسم مدونتك ولكن يفضل التصنيف لسهوله الفرز و التحديد

2-بياناتك الشخصيه في الميل هكذا :
* الاسم :-----
* هل ترغب في نشره (نعم/لا
*الاسم المستعار: ------
*اسم المدونة : -----
*عنوان المدونه :www -----
*الايميل الشخصي : ------
*رقم الموبايل :-----
(يفضل لسهوله الوصول اليك مع التاكيد علي سره البيانات وعدم تدوالها)
*تليفون ارضي : ---------
*تاريخ الميلاد: ------
*نعم اوافق علي النشر----
*اهم نقطه : لينكات البوستات المختاره مع كتابتها ضروري جدا لا تكتفي بوضع اللينكات فقط ارجو كتابتها
---------------------------------------------------------------
هنا ايميلات الفريق وهى

احمد المهني ahmed_mahana_me@yahoo.com

احمد البوهي ahmed.elbohy@yahoo.com

ايناس لطفي enas_lotfy_4@hotmail.com

ان اردت الاستفسار عن اي شيء يرجوا المراسله وكتابه كلمه استفسار في عنوان الميل ليرد عليك اعضاء المجموعه

وللعلم فقد تم تقليص المده المفتوحه للعدد الاول
فاخر وقت لتلقى الاعمال للنشر بالعدد الاول هو 22/4/2008 اى فى خلال 4 ايام واى عمل بعد تلك الفتره يرحل للعدد الثانى وما بعده

و اخيرا:
لا تتردد ابدا فى الاقدام على المشاركة و ان تخرج اعاملك فى كتاب مطبوع يصل لقطاع اعرض من الناس فالتجربة جديرة بالاقدام عليها بالفعل و فى جميع الاحوال لن تخسر اى شىء بل على العكس من الممكن ان مكاسب متعددة معنوية و ادبية و حتى مادية و كن واثق فى اعمالك و لا تنقص من قدرها ابدا

نحن فى انتظار مشاركتك و ان تطرح الفكرة بين من تعرفهم من المدونين فهذه السلسلة لن تنجح و تستمر الا بمشاركتك معنا

الرجاء تمرير هذه الرسالة لكل من ترى ان محنواها يهمه

خالص تحياتى

هشام علاء
احد عضاء مدونات مصرية للجيب
صاحب مدونة كلام هشام
http://heshamwords.blogspot.com

_______________________________________________

دي اضافه جاتلى ف ايميل من bosbosصاحبة مدونة الروح

وللعلم فقد تم تقليص المده المفتوحه للعدد الاول
فاخر وقت لتلقى الاعمال للنشر بالعدد الاول هو 22/4/2008 اى فى خلال5 ايام واى عمل بعد تلك الفتره يرحل للعدد الثانى وما بعده
---------------------------------------------------------------

انا شخصيا الفكره داخلت مزاجى بس الفتره دي مليش نفسي لاي حاجه فا ان شاء الله هستني اشوف اول اصدار مع ان نفسي انشر بالاخص محاولاتى الشعريه

اذا...فالهروب هو الحل

2008-02-27T05:15:00.005+02:00

سمعت اوشاعه بتقول ان الاخوان المسلمين ناويين يتنازلوا عن شعارهم اللى هو الاسلام هو الحل كائنهم مش عارفين ان شعارهم دا هو اللى مرسخ وجودهم ف وسط الناس سواء ف مصر او برا مصر نفسي اعرف لو دا حقيقي فا يا تري هيعملوا كدا ليه؟؟ هو مش الاسلام هو الحل؟؟مش الرسول قال تركت فيكم ما ان تمسكتم به لن تضلوا بعدي ابدا ،كتاب الله وسنتى _عليه افضل السلام واجل التسليم ان مكانش الاسلام هو الحل فالهروب هو الحل دا مش كلامى ،دا كلام لسان الوقع اللى احنا عايشينه طبعا الكل عارف ان الحضري هرب ،مكتوب ف الصفحه الاولى لعدد الجمعه اللى فاتت من الدستور بالنص هروب عصام الحضري مع زوجته وابنائه الى سويسرا انا بجد مقهوره انا مش هتناقش ف قضيه كرويه لان مليش ف الكوره كتير بس انا ببص للموضوع على انه مهزله مصريه شباب كتير بتهرب برا مصر سوء بطرق شرعيه او انتحار غير مؤكد عشان يشتغلوا ويبنوا حياتهم ومستقبلهم وبيرجعوا بشوية فلوس بجيبوا بيها شقه ومهر وقرشين للزمن والمعروف ان اقل مبلغ بيرجع بيه الشاب من اى دوله مش هكسبه ف مصر الا لو بقي حرامى شباب مصر بيفضلوا يشتغلوا اى حاجه عند الاجانب على انهم يكونوا حاجه جوا بلدهم والموضوع مبقاش مجرد فرصه ماديه افضل ،الموضوع بقي اشبه بالدروس الخصوصيه الواد يدخل المدرسه ياخد درس والشاب يخلص دراسته ويسافر برا مصر كانهم جزء من القانون المصري-مش قانون الحكومه دا قانون الشعب_ الا هو مفيش شغل ف مصر؟؟ بيتهيألى ان فى شغل ف مصر ايا كانت الظروف والمرتبات والاسعار ونظام الشغل وان كان الوضع مناسب او مش مناسب بس فى شغل بيقولوا اذا لما تجد رزقك ف الارض فبحث عنه ف الماء واذا لا تجده ف الماء فاطلبه من السماء يا ترى دا بقي النظام عندنا اذا مكنتش حرامى ف مصر فا روح الخليج او السعوديه او اسرائيل او امريكا او ايطاليا هو الشريف مبقالوش مكان ف البلد ولا ايه ،لما كل الناس المحترمه يا تطفش يا تعتقل يا الحكومه تمسكهم من ايدهم اللى بتوجعهم ويعرفوا يخرسوهم اكيد وطبيعي ان حال البلد هيتطور من سيئ الى اسوء الى اسوء و اذا كان فى ناس بتهرب علشان تجيب فلوس فى ناس بتهرب بالفلوس وفى ناس بتهرب بمعتقداتها وافكارها وناس بتهرب بأدميتها المعرضه للخطر داخل مصر اللى ضايقني ف الحضري بقي الراجل ما شاء الله يعتبر كنز مصري افريقي عربي ،فخر لينا كلنا وبعد ماتش مصر والكاميرون وقبله وكان الطبيعي ف اي ماتش بيلعبه بياخد ملايين وبيقبض بالدولار طب هرب ليه ،،ان كان الهروب هو الحل فا واحد زيه يهرب من البلد ليه كنت بكلم امى ف الموضوع وبقولها دا بياخد ملايين يسافر ليه ايه مضايقه قالتلى عشان ياخد ملايين اكتر يا ترى الموضوع مجرد فرص و زي اي حاجه اللى يدفع اكتر يشيل ولا الناس معادش عندها انتماء لمصر ،ولا معادش فى مصر عشان ننتمي ليها انا مقهوره ايا كان سبب الهروب ،فاكيد الهروب مش حل الهروب استسلام وخضوع و تفريط بنستسلم للظلمه وبنخضع للبلطجيه وبنفرط ف حقوقنا واولها اننا نعيش ف بلدنا وناخد حقوقنا فيها انا فاكره وانا ف الابتدائي كان دايما يطلبوا مننا نكتب موضوع انشائي عن الوطن كنا بنكتب الكلمتين اللى اى طفل مصري حافظهم وبيتين شعر لسيد درويش واحمد شوقى شويه تهيس عن حاجات مشوفناهاش وبنشوف نقيضها وحتى اللى مش بيسيبوا مصر بيهربوا جوا بيفرطوا ف حقوقهم بدعوى المشي جمب الحيط مبيفكروش ان الحيطه اول ما تقع هتقع عليهم واللى بيقولوا هو احنا اللى هنصلح الكون مش عارفين ان الفرد هو الطوبه اللى بيتبني بيها المجتمع فاذا كان الفرد سليم المجتمع هيكون سليم واللى شايفين ان الحال فل و العيشه مفيش احلى منها و دول يا حراميه_الحراميه الكبار اوى اللى واكلنها واللعه_ يا عيشين ف غيبوبه بقابل ناس كتير مش راضيين عن البلد ومش حابيين الوجود فيها دا اذا مكانش كل الناس دا احساسهم المهم انا مبحبش حد يخبط ف مصر قدامى فا بيكون ردي مش عاجباك دورلك على بلد غيرها وبيكون الرد ف الغالب ياريت الهروب مش بيحل المشاكل الهروب بيسبها متعلقه وانا لا اقبل بالاوضاع المعلقه اذا..الهروب ليس هو الحل ..فلنجد لنا حل......

عشنا وشوفنا

2008-02-08T16:11:00.000+02:00

عشنا وشوفنا واللى يعيش ياما يشوف ويسمع امبارح كان يوم حافل بالنسبه ليا ،المهم فا اخر اليوم وفى حوالى الساعه العاشره والنص بينما الناس مرصوصه قداما لتليفزيونات بتتفرج على الماتش كان عندنا امل نروح البيت سواء بتاكسي او ميكروباص اهم شئ نروح المهم واحنا واقفين مستنين فرج ربنا وانا واقفه مديه قفايا للدنيا والخلق ببص على النيل وبفتكر ذكريات جميله عشتها وشهد عليه وافتكرت انى كنت بحقد على اى اتنين اشوفهم سوا على النيل لحد ما عشت اللحظه دي وبطلت احقد على خلق الله المهم احسست بهرج ومرج_دا غير المرج اللى ف الحديق_وشوفت رجل مش قادر يظبط توازنه وعمال يتمرج_على فكره مكانش فى مرجيحه_انا قلت يمكن دايخ رجله بتوجعه او ربنا يعافينا عنده شلل رعاش بس الواضح ان تفكيري طفولى شويتين كان تعليق كل الساده لحضور_كاننا ف مسرحيه_انه شارب وطبعا مكانش شارب فانتا تفاح ولا كوكا زيرو كان شارب مسكر والعياذ بالله ببساطه شديده انا اترعبت وقلت لماما لازم نروح باي شكل ،بس مش امى اللى تتهور وتمشي مترين اللى انا مندهشه منه ان ازاى مفيش حد ابدا فكر ياخده من قفاه للبوليس ينام ليله على البورش ويصحي فايق انا اول ما شوفته حسيت بالاشمئزاز والشفقه الانسان دا مريض ومن حقه اننا نساعده ومن حقنا نحافظ على نفسنا من شره وتستمر المغامره ونركب مع الراجل دا الميكروباص نتجاهل البذاءات اللى كان بيتفوه بيها مرضاش يدي الراجل السواق فلوسه قام واحد راكب اتطوع ودفعله وقعد يشتم ف الواد اللى مع السواق الواد اتنرفز راجل تانى قعد يهديه ويقوله معلش حقك عليا اشتمنى انا وملكش دعوه بيه للدرجه دي كانوا خايفين على مشاعر السكير دا ولا كانوا خايفين منه انا لاحظت ان خلقته مش غريبه عليا صورته كانت موجوده ف مكان ما ف ذاكرتى وبعد شويتين لما قربنا نوصل وجهتنا ركبت واحده وكانت عارفه الاخ دا وقعدت تكلمه لما الليدي دي كلمته امى سمعتها بتقوله ميمي وبما انه ميمي وبما ان شكله من المنطقه اذا ماما عرفت تحديدا هو مين انا كنت اوشك على الانهيار انا مؤخرا بعد حاجات كتير حصلت حواليا كرهت المكان اللى انا عايشه فيه _ربنا يسامح جدو كان مالها المحله_المهم انا ترسخ جوايا بعد الموقف دا رغبتي ف انى اسيب المنطقه دى بعد ما كنت كرهت الميكروبصات وقررت اتحول لمناصرة التاكسي تراجعت فلتحي الميكروباصات لو كان ينفع كنت اشتغل تباع

العلاقه بين النقاب و كل حاجه وحشه

2007-12-23T22:12:00.000+02:00

من زمان وانا بفكر اكتب ف الموضوع دا من اول رمضان
بس الدراسه فاتحه نفسي ومخليانى مقبله على الحياه اوى اللى خلانى ابدء ف كتابة البوست دا الموضوع اللى قرئته ف بص وطل لشخص اسمه محمد فتحي توصلت من كلامه انه استاذ جامعى ف ايه الله اعلم الاخ دا بقي كان كاتب مقال ف جريدة الدستور باسم المتلاعبون بالعقول وكان حوالين اكتر 20 شخصيه دينيه_شيخ يعني_ماثر ف الشعب المصري وليه مكانه كبيره عنده
انا مقرئتش الموضوع بس هو الموضوع اللى كتبه ف بص وطل تحت اسم عن السلف والخلف كان اشبه ما يكون بدافع عن نظريته وتبرير اللبس اللى حصل والمقتطفات اللى قالها من موضوعه كانت عبره عن وجهات نظر شخصيه متمسش كرامه اى شيخ منه او تقلل من قيمه او تشكك ف علمه
وكانت ما بين ان شيخ بيميل للترهيب وشيخ اسلوبه هادى و وصف الشيخ محمد حسان بانه شيخ الغلابه وانا من رأي ان الراجل لو كان سمع التسميه دي كانت هترضيه
اللى حصل بقي ان عمو محمد فتحي اتعرض لهجوم اقل ما يوصف انه شرس بسبب الموضوع دامن السلفيين _على حد كلامه_ انا مش شايفه ان لفظ سلفي يدعو لاى حاجه وحشه ولا المفروض يجي ف دماغ حد تنظيم القاعده والظواهرى وبن لادن مع العلم ان الناس السلفين بيرفضوا الحاجات دى والارهاب باسم الجهاد
نسيب موضوع عمو محمد وندخل ف موضوعي انا
زي ما قلت الموضوع دا ضارب ف دماغى من رمضان
واللى زود تفكيري فيه ان اختى لبست النقاب ف رمضان ،انا مش هغلط ف اختى واقول انها معندهاش لا ادب ولا زوق ولا اخلاق هو دا ممكن يكون ليه اساس من الصحه بس دا نابع من قفشات بتحصل بيني وبينها زي اى اختين مفروض عليهم العيشه ف اوضه واحده
فيما بين تالته اعدادى و اولى ثانوى زميلات مقربات ليا كتير لبسوا النقاب بس من معرفتى بيهم انا متاكده ان ف بنات كتير مش لابسين حتي خمارواخلاقهم اعلى من البنات دول
وبرضوا من الحياه بشوف منقبات منظرهم يصدم الواحده تبقي ماشيه حاطه جردل برفيوم على هدومها ومبينه عينها وحواجبها و مظبطين عينهم على الاخر وحاطين لينسيز ملونه
من وجهة نظرى دا تصرف حقير
ولما ابقي ماشيه انا وصحاباتي ونلاقى واحده منقبه مذه _ولا مؤاخذه ف اللفظ_احنا بنات والمنظر بيشدنا وبنقف نتفرج
طبيعي ان اى انسانه طبيعيه بتفكر باسلوب طبيعي بتحاول تكون جميله قدر الامكان
بس المعروف ان الواحد لما بتلبس نقاب بيكون لعدة اسباب اما تكون وحشه او عندها حاجه غلط ف وشها ومخبياه لهذا الغرض او انها تكون جميله جداو بتغير على نفسها او جوزها بيغير عليها ومش عايز حد غيره يشوفها واخيرا ممكن تكون الواحده لابساه على انه طاعه او عباده على اختلاف الشيوخ اذا ما كان سنه او فرض
و لو كان فرض ف المفروض اى بنت لما توصل للسن اللى الحجاب يبقي فرض عليه انها تلبس النقاب عالطول مش زي ما الكل بيعمل -اللى بيقرروا يتحجبوا اساسا يعني-ياخدوا السلم واحده واحده شويه بادي وبنطلون شويه جيب قصير على بوت
شويه تطول الجيب شويه لحد ما توقع العريس _الضحيه_بعد كده كل شيء ينكشفن ويبان سواء هتنسي معني كلمة موضه او تنسي لفظ الاناقه والشياكه وتقضيها بعبايه وشبشب زحاف ما هو العيال وابو العيال مش هيدولها فرصه لغير كده
ولو كان سنه ف الموضوع كبير وفيه اولويات يعني الطبيعي ان الواحد يقوم بالفروض كلها و يركز على الجوهر ولما يبقي فل الفل يدور على شكله من بره مش يتحول النقاب لمجرد واجهه بتخبي تحتها شخصيه ف منتهي السوء الخلقى والادبي والثقافى والاجتماعى

هو الناس لما بتشوف واحده لابسه من غير هدوم بتحترمها وتقول عادى هي حره ومش من حق حد يمنعها من اللى هي بتعملها مع ان الحجاب فرض على كل واحده مسلمه وانا على ما اخد بالى عايشين ف دوله اسلاميه
ولما يشوفوا واحده لابسه نقاب يتهموها بالتخلف ويقول مبتدعه وارهابيه ومش بعيد تكون حراميه
كان النقاب واللحيه هما العناصر الاساسيه للارهاب والتخلف والهمجيه والفضل يعود بالتاكيد لاعلامنا اللى مبيطلعش الراجل الملتحي الا بالشكل دا زي فيلم الارهابي والارهاب والكباب و دم الغزال وهي دى الفكره اللى يعرفها الغرب عننا
حصل حاجه غريبه من حوالى سنه فيلم على ما افتكر كان لشارون ستون و يتخلص ف انها كانت مسافره على طياره وابنها اختفي وكان معاها على الطياره واحد مسلم لابس زى اسلامى وبدقن اتهمته انه هو اللى خطف ابنها و ف خلال احداث الفيلم عرفت ان فى شخص غيره هو اللى خطف ابنها وجه الشخص المسلم دا وساعدها على انها ترجع ابنها وكان اخر مشهد ف الفيلم ليها وهي بتعتذرله وبتشكره
حاجه زي دى متحصلش ف فيلم او مسلسل عربي
مع العلم يعني ان اطلاق اللحيه حاجه متخصش المسلمين بس دى سنه من سنن الفطر ربنا خلق الراجل بدقن حب يحتفظ بيها عادى ميضرش ولو محبش يحتفظ بيها هو حر مش هياخد سيئات لانه مسابهاش

انا مش فاهمه ايه العلاقه بين النقاب واللحيه واي حاجه وحشه
مظنش ان فى علاقه لو شخص تفكيره ساب دقنه وعمل فيها عم الشيخ واستغل الموضوع دا عشان اغراض شخصيه مظنش اننا نقول ان اى اوحد سايب دقنه وحش
دا حتى اليهود بيسيبوا دقنهم
فا العلاقه مش حتميه
ولو واحده اخلاقها وحشه ولبست نقاب مينفعش نقول ان المنقبات وحشين
متجيش خالص اننا نحكم على الكل من خلال جزء

يا ترى انتوا ايه رئيكوا

تعالوا نجيب ف سيرة الحب

2007-10-20T07:25:00.000+02:00

احتار الفلاسفه والفنانين على اختلاف فنهم وحتي السياسين _اللى بيحلوا كل عقده _والناس العاديين ف حط تعريف ثابت او صحيح للحب
كل انسان بيوصفه على حسب ما عرفه منهم اللى حب الحب اكتر من الانسان اللى حبه ومنهم اللى كره الحب بسبب انسان حبه

بالاضافه للون الاحمر المعترف بيه دوليا رمز للحب والرومانسيه وحالة الحصبه اللى بتصيب ناس كتير يوم الفلانتين

كنت قرءت من فتره طويله عن سبب اختيار الورد الاحمر رمز للحب بس مش هقولكم عليها لانها مجرد اسطوره

ندخل ف المفيد
انا مؤمنه ان الحب هو اساس وجود الانسان على الارض بداية بحب الانسان للارض لحد حبه للحياه مرورا بحبه لذاته ولاهله ولالهه

بس الحب اللى انا عايزه اجيب ف سيرته هو حب الرجل والمرأه
هو احنا بنحب ليه وامتى وازاى ولحد فين

بحكم انى تلميزه ف الثانوي فا بسمع كتير عن قصص الغرام والانتقام
واللى بيكون اغلبها مراهقه وتقضية وقت
واحده بتحب واحد من سنتين و عمرهم ما كلموا بعض وصحبتها اللى هى جارته شغاله مرسال غرام

و واحده بتزل ف الواد اللى بيحبها مع انها بتموت فيه وتيجي تخنقنى انا وكل ما يقولها حاجه تصده

ولا بنت عمى اللى هيمانه ف زميلها اللى اجدع حاجه يعرف يعملها ف الدنيا ان يكشر ويلعب كوره ورافضه كل اقتراحاتى للوصول لخبايا قلبه

واللى بتحب اربعه دفعه واحده
واللى تفضل هتموت على واد ويوم ما يحاول يكلمها تزحلقه وتشوف واحد غيره وتكرر الموضوع معاه
المشكله انها بتتخنق جامد لما تعرف انه ماشي مع واحده بعد كده
ولا اخر نكته
زمايلي ف الفصل كانوا بيحكوا على عيل وبيقولوا ايه ان نص بنات المدرسه ماشيين معاه
فانا وببراءة الاطفال سئلتهم يعني هما عارفين ولا بيمشي مع واحده من ورا التانين قالولى لاء عارفين
قلتلهم ازاى يعني مفيش واحده تقبل على نفسها كده
قالولى دا واحده قالولها الكلام دا قالت انا يشرفنى انه يكلمنى وانى اكون واحده من صحباته
لا تعليق

ندخل ف الجد شويه
نتكلم عن الناس اللى بيحبوا بجد بيحبوا حقيقي
بيتهيالى ان النهايات السعيد حكر على الافلام والمسلسلات
لما واحد و واحده يحبوا بعض ويربطوا مصيرهم ومستقبلهم ببعض
ويجي اهلهم يرفضوا علاقتهم لاى سبب عبيط واهبل واهطل دائما
ف الغالب الاعتراض مش بيكون على شخص الحبيب او الحبيبه بتكون المشكله اما البت محجوزه لابن عمها او حتى الواد محجوز لبنت عمه
او بسبب ان الشخصين دول لسا بيدرسوا وقدام الاخ المسكين سنين على ما يجيب شقه تعجب ام العروسه ولا تكون ام العريس مش بتستلطف اخت العروسه_انا بدءت اخرف اثار الجوع اصلي صايمه_من الاخر الاهل بيخلقوا مشكله عشان يفرقوا الحبيبين والقول الشائع ان الحب مش بياكل ولا بيلبس ولا بيدفع فواتير_من الاخر الجواز دا مزايده اللى يدفع اكتر يشيل_
دا مش رئي طبعا وبعيدا عن رئي الشخصي ف الجواز
هحكيلكم حدوتين صغننين
بني ادم اعرفه وهو ف سنه اولى جامعه حب زميلته وشاءت الاقدار انها تكون معرفه قديمه
الواد اتهور واخد اهله وراحوا قروا الفتحه وخطبها
كده فل
فضلوا اكتر من سنه على الحال دا يجي بعد شويه يا حبة عيني يقولى انه سابها اقوله ازاى يقول مش بمزاجى ولا بمزاجها_طب اهلهم وافقوا الاول ايه اتغير_صوت العقل صحي جواهم واكتشفوا ان لسا قدامهم سنتين ف الكليه
مع ان الواد ما يتعيبش وبيشتغل من اول ما خلص الثانوي

الحكايه التانيه _دى على ضمانة علا الراوى يعني_
البت بنت خالتها كانت بتحب واحد جه اتقدم لاهلها رفضوا وجالها كام عريس تانى وكانت البت بترفضهم
البت من غلبها قالت للواد انهم يتجوزوا من ورا اهلهاويحطوهم قدام الامر الواقع بس هو طلع راجل ورفض وقالها يصبروا شويه ويحاولوا تانى

نقطه صغيره
مش اى واحد حبيبته تعرض عليه العرض دا بيرفض ولو كان قبل هما اه كانوا هيتجوزا على ايد محامى ولا مازون بس المعروف ان جواز البنت من غير ولى باطل عشان دا شرط اساسي من شروط العقد
بس الحمد لله ميدو ومروه يا اتجوزوا خلاص يا فرحهم قريب بس هو مكانش بمزاج اهلها خافوا البت تعنس

اكتر حاجه غريبه ف امر الحب دا هو الحب بعد الجواز
يعني ممكن تلاقى اتنين كانوا دايبين وهيمانين ف غرام بعض قبل الجواز وبعد الجواز الموضوع يتحول للنقيض

وممكن اتنين يكونوا اتجوزوا جوازة صالونات وتلاقى حياتهم فل
بس دا مش معناه ان كل اتنين اتجوزوا بعد قصة حب عيشيتهم سودا دا الغالب والى شوفته من واقع الحياه

حتي لو علاقة اى ثنائي بعد الجواز سواء كانت جوازه والسلام او بعد قصة حب فا الوضوع بيتحول لعلاقه روتينيه ممله عموما خصوصا ف علاقتهم ببعض
الاخ يفضل مطحون ف الشغل طول النهار يرجع ياكل وينام وبعدها ينزل يقعد على القهوه وام العيال تقعد ف البيت تحتاس بالعيال طول اليوم
لو كانوا ناس محترمين فا مش دايما بيلاقوا وقت يتشاكلوا فيه
الكلام دا انا بقوله من واقع الافلام

انا بقالى 20 يوم بكتب ف البوست دا وحاسه انه اسوء حاجه كتبتها لانى كتبته على مراحل ومكنتش ببقي مركزه فيه بس لما اكتبه

بس كان جوا الواحد شوية كلام وتساؤلات بخصوص الكائن الغريب اللى دخل جواه ومنفعش معاه كل الامصال المعروفه ولا وسائل الحمايه الفعاله
بس هيفضل امر الحب عجيب مع اننا منعرفش هو عامل ازاى بس لما بيتخطي وسائلنا الدفاعيه ويحنل قلبنا بنعرف ان هو دا ف المفروض مشغلش بالى ب دا

الموت علينا حق

2007-09-25T03:00:00.000+02:00

اول امبارح حصلي حادثه صغيره ف المطبخ كانت هتضيع عمرى ماما كانت حاطه حاجه ف الكهربا السلك بتاعها كان نازل على درج ف المطبخ انا فتحت الدرج دا اخدت منه مقص وفتحت كيس السجق وجيت ارجع المقص مكانه_على غير عادتى يعنى_فا السلك كان نازل على الدرج مسكت السلك وجيت ارفعه عشان افتح الدرج السلك مرضاش يسيبنى_حتى سلك الكهربا بيحبنى لستر ربنا امى كانت معايا ف المطبخ ساعتها انا وبطريقه لا اراديه قضلت اصوت ازاى معرفش لكن مكنتش عارفه اتكلم ولا اتحرك فضلت اصوت وانا حاسه بالكهربا ماشيه ف جسمي مع انى حسيت انى ف اقل من دقيقه هكون ميته مكانش قدامى اى فرصه انى اعمل اى حاجه امى شافتنى فضلت مصدومه واول ما اخدت بالها ايه اللى بيحصل شدت السلك من ايدي من رحمة ربنا ان السلك مكانش كله مكهرب هو الحزء بس اللى انا كنت ماسكاه منه اللى فيه قطع منعرفش عنه حاجه كنت انا وامى هنضيع اللى حصل انى اول ما ماما شدت السلك من ايدي واستوعبت اللى حصل قعدت اضحك جامد_معلش دا حالى لما بتصدم اشحال لما اتكهرب امبارح بقي جدتي ماتت الساعه 2 يعني اول مانا طلعت من المدرسه هى تعبانه من شهرين بس كانت ف حالتها الطبيعيه اللى هي عليها من شهرين انا زعلانه من نفسي لانى حاسه انى متاثرتش بموتها مش عارفه اذا كان دا نابع من اننا يعتبر كنا منتظرين موتها لان الموت كان راحه ورحمه ليها مكانتش مرتاحه ابدا ومكانتش عارفه ترتاح ازاى ولا دا حصل لانها مكانش ليها وجود حقيقي ف حياتى ولا لانى بحسدها انى سابت الدنيا دي يا ترى حالها دلوقتى ايه كانت ست كويسه بتصلي وبتصوم وبتروح الجوامع بس انا بعد موتها بس حسيت اد ايه الموت شئ مخيف مهما كان عمل الواحد لازم يخاف من الموت انا كنت بتمنى الموت كتير مع انى مش متاكده انى مستعده اقابل ربنا يعني حتى التلميذ المتفوق بيخاف من الامتحان انا اللى حالى مش مستقر المفروض احس بايه يعني لو كنت مت اول امبارح كنت هتغسل واتكفن وادفن واروح دنيا تانيه مبقتش عارفه ايه يخوف اكتر انى اعيش ف الدنيا دي ولا انى افارقها (انا لله وانا اليه راجعون)

حقوق المرأه

2007-08-29T21:46:00.000+03:00

من كام يوم وانا بشوف النشره_محدش يفهمنى غلط اختى هى اللى كانت بتتفرج وانا قعدت جمبها_المهم وانا قاعده جمب اختى وهي بتشوف النشره املا فى انها تجيب حاجه مفيده والفائده من منظورى دائما ما تئتي من فيلم او برنامج اجنبي فى هذا الموقف بقي شوفت خبر مفاده ان فى فرقة اطفاء ف ايران مكونه من عناصر نسائيه؟؟؟اه والله العظيم وجابوا صور الستات دول كانوا ستات حلوين خالص مش شبه بتوع المصارعه وكمال الاجسام يعني ومحجبات ولابسين لبس محترم وعملى لا داعى لذكر ان ابويا معجبوش الموضوع ساعتها افتكرت خبرين قراءتهم قبل فتره على النت عن طقم حراسات خاصه نسائي ف البحرين و التانى كان عن تدريب ستات ف السعوديه عشان يكونوا مؤهلين لعمليات الانقاذ واعطاء تعليمات للمصطافين ازاى يحافظوا على سلامتهم وهما بيصيفوا على ما اظن دا لان فى ف السعوديه شواطئ منفصله للستات وفى ف دول كتير بس مهياش عربيه ستات بينضموا للشرطه والجيش وبعد ما شوفت الخبر الاولانى بكام يوم شوفت خبر تانى ان الستات المتخرجين من كلية الحقوق ف السعوديه رافعين قواضي وعايزين حقهم ف المرافعه ف المحاكم وافتكرت دلوقتى ان من مده تقل عنه سنه صدر قرار بتعيين حوالى 30 قاضيه ف المحاكم المصريه انا عمرى ما كنت من المنادين بالمساوه ولا شايفه ان الستات مش واخدين حقهم عشان اطالب بحقوق المرأه بس انا اه محسوبه على جنس الحريم بس مش عارفه الستات عايزين ايه سعاد حسنى قالت البنت زي الولد مهياش كمالة عدد انا متفقه معاها بس ربنا قال (للرجال عليهمن درجه)؟ هو فى حاجات ربنا فرق بين الراجل والست فيها و التفريق دا ناتج عن حكمه موصلهاش عقول الناس اللى منهم ناس بيطالبوا بان الست تورث اد الراجل مش هي دي قضيتنا القضيه انى شايفه ان فى فروق بين الست والراجل دا ف المضمون بس عموما احنا متساويين ربنا رفع الرجاله ف حاجه وميز الستات بحاجه قدها هو فى دول ومناطق الستات فيها محرومه من كتير من حقوقها وبتتعرض لظلم وتحقير من الراجل و بيتبصلها نظره دنيويه مع ان ف اغلب الحالات دى بتكون الست مفيده اكتر من الراجل اى واحده اتحرمت من حقوقها اللى بيكفلها الشرع والقانون سواء ف الاسلام او اى دين تان فا هى ضحيه شاركت المجرم اللى ارتكب جريمته ف حقها ف تنفيذه لجريمته اصلها حاجات مبتحصلش بين يوم وليله دى تراكمات لما واحده تفرق ف حقها اللى عايزه اقوله ان اغلب الفروق اللى بنعترف بيها ف حدود مجتمعنا فروق وضعيه ما انزل بها الله من قرأن ولا حديث السبب ايه انا معرفش يعني فى حاجات يعيبوها على الواد ويحرموها على البت مع انها حرام على الناس كلهم وحاجات يفرحوا لما الواد يعملها ويتخضوا لما البنت تعملها مع انها حاجات عاجيه خالص انا قلتلكم قبل كده اننا مجتمع معقد نفسيا الا الستات عايزين يتساووا بالرجاله لانهم معرفوش يبقي ستات انا بلاحظ ان اغلي المعقدات نفسياا_دا باستثنائي يعني_يا وحشين يا دمهم تقيل يا عار على جنس الحريم انا شايفه ان مفيهاش حاجه ان الست تبقي شرطيه ومجنده ومحاميه وقاضيه وسيدة اطفاء هى كلها حاجات نبيله ومظنش ان فيها تشبه بالرجاله مع انها تتعارض الى حد ما مع وظيفتها الاساسيه كا ام ومربية اجيال لانها بتحتاج تفرغ ومجهود شاق انا واحده مثلا كان نفسي ابقي كل حاجه ف الدنيا باستثناء ابقي رئيسة الجمهريه بس انا ناويه ادخل جامعه واخد شهاده اشتغل بيها بس على ما اظن انى لو اتهورت واتجوزت هعيد حساباتى

ياخوانا...ياسر اتجوز ريجينا

2007-08-24T21:16:00.000+03:00

انهارده بتاع الساعه 4 لقيت ياسر داخل ومقليش غير كلمتين انا اتجوزت وبعتلى سمايل انا تنحت وفى هذا الوقت بينما انا متنحه ياسر اختى بعدها ايميلي اتقفل بعدها الجهاز هنج وفجاءه كابل النت اتشال يعني مش انا بس اللى المفاجاءه لغبطتني شوفتوا مسلسل احمد اتجوز منى ؟؟انا مشوفتوش بس مش هي دي المشكله محدش يتنح انتوا طبعا عايزين تعرفوا مين ياسر ومين ريجينا ياسر ياخوانا دا انسان مميز جدا بلنسبالى بدليل انى شخص لا يتقبل النصيحه بس هو الوحيد اللى بسمعله وباخد كلامه ثقه وبقبل نصايحه ريجينا بقي كل اللى اعرفه عنها انها من روسيا وان هي وياسر بيحبوا بعض انا اعرف ياسر من يجي سنتين ومن ساعة ما عرفته وهو بيكلمنى عنها انا اه مش بستلطفها اوى لانها طلعت عينه كتير _حاجات بتحصل بين الحبيبه عادى_اللى كان مدايقني منها ان طول ما هى اون لاين كان لا يمكن ياسر يكلم حد ولو عبر حد ف بيرد عليه عشان يزحلقه نقول ايه الفرقه صاعبه طول السنتين اللى فاتوا كنت تانى حاجه بسئل ياسر عليها لما اكلمه اخباره مع ريجينا كنت مستعجله على جوازهم اكتر منهم ماهو اللى ايده ف المايه مش زي اللى ايده ف النار طبعا كان فى عوائق كتير ما بينهم بس انا كنت قلقانه لان ياسر عنس _محدش يقوله انى قلت عليه كده مع انى بقوله لما اكلمه اكتر من كده_ هو اكيد مكانش قرار سهل ليهم هما الاتنين بس انا كان نفسي اشوف عيال ياسر يعني اتنين مقربين على الاربعين ولسا عايزين يدرسوا اخلاق بعض انا اعرف ان الاتنين مروا بتجارب ربنا مقدرش ليها انها تستمر وسببتلهم اذي وانا كنت عارفه ان حاجات كتير ف حياة ياسر متوقف على الجوازه دى وكنت بدعيله كتير ان ربنا يوفقه هو الدنيا وقفت ساعتها وملحقتش اعرف اى تفاصيل وانا لا اتنازل عن التفاصيل ابدا بس انا فرحانه جدا الجوازه دى وكان نفسي لو اقدر اكون معاه ف اليوم دا واتمنى ان كل حاجه كنت معلقه يا ياسر ف حياتك لحد ما تتجوز ربنا يقدرك وتحققها ياما نفسي تقولى انك بطلت تدخن وانك بقيت بتصلي وانا بدعيلك وبتمنالك من اعمق نقطه ف قلبي ان ربنا يجمعك انت وريجينا ف الدنيا على طاعته ويجمعكوا ف الجنه ان شاء الله

جمعية رساله

2007-08-19T18:01:00.000+03:00

من زمان اوى وانا نفسي احس انى بعمل حاجه مفيده ومؤثره وجه الفرج من عند ربنا يوم الجمعه بعد ما امى وابويا وافقوا انى اطوع انا واختى ف الجمعيه امى جات معانا هتقولوا ليه؟؟ هقول رخامه ورحنا وجات بنت لطيفه قعدت كلمتنا عن الجمعيه انامكانش فارق معايا اسمع حاجه بس امى اللى كانت معقده الامور شويه وجابتلنا استمارات تطوع والموضوع تم اوكى احنا اها اتمرمطناعلى ما رجعناقعدنا ساعه ونص على ما رجعنا بيتنا بس انا خلاص اتعودت وبما انى ف الثانويه العامه وعندى كل يوم درس ولا اتنين وكل اسبوع امتحانين ولا تلاته غير المدرسه فأظن ان العمليه بايظه معايا خالص يعني البت اختي راحت امبارح وانا مكانش ينفع اروح عشان يومي كان مشحون خالص انهارده كنت فاضيه من الساعه 4 واختى كسلت تخرج وامى قعدت تتلكك ومخرجتش عالم ممله بس اديني اخدت خطوه ومش كل يوم هيلاقوا حجج ممله وهسكت بصراحه الجو ميشجعش اوى والموصلات تخوف اكتر خصوصا انى مدرستش المنطقه والمواصلات المتاحه والبدائل المباحه بس اديني اخدت خطوه الجمعيه دى لها فروع ف اغلب محافظات مصر وفى محافظات فيها اكتر من فرع وهى قايمه على التبرعات وجهود المتطوعيين يعني الجمعيه محتاجه لا مساهمه من اى حد وبأش شكل وفى نشاطات كتير ليها زى المعارض بتاعة الهدوم والتوظيف وبنك الدم والتوعيه الصحيه و محو الاميه ودروس تقويه و رعايه للمكفوفين وزوي الاحتياجات الخاصه وزيارات خارجيه لمستشفيات ودور مسنين ورعايه صحيه وكل ما كان فى متطوعين اكتر و تبرعات ماديه وعينيه اكتر دا هيسهل ف عمل الجمعيه وهيخليها تقدم خدمات اكتر لناس ليها متطلبات اكتر فا كل واحد يشوف مقر الجمعيه ف بلدهم ويروح يستطلع الجو ويشوف ايه ممكن يعمله

عقدة الخواجه

2007-08-10T11:02:00.000+03:00

من اول ما جيت الدنيا دي بسمع كلمة عقدة الخواجه وكل الدلائل ف الدنيا وضحتلى ان الشعب المصري اكتر شعب مصاب بعقدة الخواجه فى موقف علق ف دماغى بخصوص الحكايه دى انا عدي عليا زيه عشرات المواقف بس يمكن دا احدثهم واثر فيا جامد انه على قناه لا داعى لذكر اسمها هي قناه بتمويل سعودي بس بتتبث ف مصر وكانوا بيقدموا فقره تجاريه اعلانات يعني والمقدم ولا المذيع و ف وسط الكلام تدراك شيء وقال لزميله واكيد بنفكر اعزئنا المشاهدين ان المنتج من الخامات المستورده انا حسيت باندهاش ف مشاعرى وكان الاندهاش هيوصل لعيني مبتهج اوى الاخ ان المنتج خاماته مستورده انا بقي ببتهج لما اجيب حاجه حلوه وتكون صناعه مصريه بس بتقهر لما اكون مع حد ويبقي بيشتر حاجه ويطلبها مستورده المانى او فرنساوي او تيوانى وحاجات بيبقي في ليها بديل مصري اللى انا مش عارفاه امتى الشعب المصري اصيب بالعقده دى اللى ممكن نقول انها مرض نفسي انا برجح انها ظهرت مع وجود الاحتلال بس بعد الاحتلال مختفتش ليه لما الواحد يمشي ف الشوارع الرئيسيه ف اى حته ف بلدنا دى هتلاقى كل يافطة محل يا مكتوب عليها كلمه عربي بحروف انجليزي يا كلمه انجليزيه اساسا ولما تدخل محل اى حاجه والبياع يحب يبعلك ياخدك على جمب ويقولك انا عندى مش عارف ايه بس مستورد هيعجبك اوى الحاجات المحليه لازم اعترف ان مستواها متدني واللى يشترى حاجه مصرية الصنع يبقي بيجازف مجازفه غير مضمونه ومن حق يفضل المستورد على المحلى بس الذنب مش ذنب المواطن المسكين اللى مش مستعد يدفع فلوسه على مفيش حكومتنا العبيطه-مع احترامى لاى حد عبيط_سياستها الشيطانيه_مع تعوذي من الشياطين_بتصنع حاجات جودتها عاليه وتحصصها للتصدير والحاجه الرديئه بتكون للناس الغلابه اللى امكانياتهم الماديه لا تسمح ليهم انهم يشتروا المستورد ندخل على الصين مفيش مواطن مصري بيته يخلو من عشرات الحاجات الصينية الصنع سواء فانوس او منبه او شنطه او يمكن قلمه او مقشه او جهاز كهربائي ولا السجاده اللى ببصله تصدقوا انى جايبه بجامه مكتوب عليها روبي وابص على التيكت بتاعها الاقى مكتوب عليها صناعه مصريه دول عالم ميعرفوش حاجه عن رمضان وبيصنعولنا فانوس رمضان ولا داعى لذكر انها بردوا بتصنع الحاجات درجات وبتصدر للشرق الاوسط اسوء الخامات وبردوا الاسواق المصريه غرقانه منتجات صينيه حاجه رخيصه وتقضي الغرض ونسيب المصري ونشتري الصيني فى موضوع قرئته ف مجله الكترونيه بتصدر من غزه الموضوع بقي ان كان فى اجتماع لرجال الاعمال المصريين مع رجال اعمال يابانين واحد من اليابانين لاحظ ان جزمة واحد من المصريين من ماركه فرنسيه مشهوره وتمنها حوالى 28 الف جنيه فا قاله ليه يعني تشترى جزمه زي دي هو انتوا معندكوش جزم كويسه ف مصر قاله لاء عندنا بس الصناعه دى مش متقدمه اوى ف مصر قاله وليه متحاولش تنهض بيها قاله مشروع زى دا هيحتاج مصانع حديثه وتدريب عماله ورأس مال كبير رد عليه الراجل اليابانى وقاله انا جزمتى صناعه وطنيه وكل يابانى بيفخر انه يلبس جزمه من صناعة بلده حتى لو جودتها مش عاليه و دا سر تقدمنا حاجه تقهر بجد ياخوانا انا مش هقول نبطل نلبس جزم فرنساوي و ايطالى انا متيمه بالكوتشي بتاعى اللى من بيت ازياء ديور بس هي الفكره العامه الانانيه اللى احنا عايشنها واحد زي دا مش مستعد يتعب شويه عشان ينهض ببلده وعايز يلم ملايين على الجهاز مش شايف حد غير نفسه وحسابه ف البنك دا حتى ياخوانا لما نلاقى حاجه صناعه مصريه وقبل ما نستشعر نشوة الفرح نلاقى مكتوب لصالح شركة مش عارف ايه ولا بترخيص من شركة ايه وصدقونى وعن تجربه الحاجات اللى مصنوعه ف مصر بترحيص من شركات اجنبيه مش بتكون على نفس الجوده اللى بيكون عليها المنتج المصنع ف بلد المنشأ او دوله من دول الخليج انا مثلا يروح السوبر ماركت اقف قدام قسم الشامبو امسك ازازه واحطها ف الباسكت بتاعى تيجي ماما تشوفها وتمسك واحده تانيه وتقولى لاء هناخد دى ال ايه دي صناعه مصريه وصناعة بلاد الواق الواق فعلا احنا شعب معقد بس انا مش هطلع عقدي الوطنيه على حد واقوله تشترى المصري هو اه مش مفيد بس مش اكيد انه هيضر ياخوانا احنا ضحايا حلفاء ابليس عايشين ف دوله حامهيها هو حراميها بس لازم اعترف ان اي ضحيه بتساعد المجرم ف الايقاع بيها العجز ف الميزان التجارى لمصر مع اى دلوه يتجاوز عشرات الملايين وياريتنا بنستورد حاجات مفيده لو فضلنا كده هنعيش ونموت واحنا شعب مستهلك لا يقوي على الافاء باحتياجات حياته الاساسيه مع اننا ف عصر الكماليات والجماليات فيه ضروريه

الحدوته التالته

2007-08-02T10:27:00.000+03:00

انا مقهوره من الناس اللى بيعدوا على البلوج ومش بيعبرونى بتعليق او يقولولى رئيهم في اللى اان كتبته على الايميل بس ما علينا عندى حاجات تانيه اتقهر بخصوصها انا كنت مقهوره الاسبوعين اللى فاتوا لان النت بتاعى الحقير جدا كان بيلعب بيا ولما اتظبط الجهاز اتخرب_الكل بيلعب بيا_بس الحمد لله يعني و يكفيني انقهار انى هبداء دروس انهارده واحلام الاجازه كلها اتدمرت الحمد لله وهدخل الثانويه العاميه _يارب تفتح على حظى بحق الغلابه يارب_من غير ما استجم هبداء دروس وانا مقهوره ان شاء الله الجمعه اللى فاتت كانت مغامره فظيعه زي مانتوا عارفين انى عايشه ف طلخا بس اللى انتوا متعرفهوش ان جدتى واخوالى وخالاتى عايشين ف المنصوره الجمعه اللى فاتت بقي كان كتب كتاب خالتى _عقبال السامعين_المهم انى رحتلهم وامى واختى مجوش _عادى جدا_وباستثناء المرمطه اللى اتمرمطتها طول اليوم والمشي اللى مشيته ف عز الحر ف نص اليوم كانت المصيبه الكبيره لما قلت اروح كانت الساعه بتاع تمانيه ونص نزلت من بيت تيته ومشيت شويه عشان اركب مش لازم احدد الشويه دول كانوا كام متر بس هما كانوا كتير و وقفت شويه كمان بس ماكانوش كتير قرفت مشيت شويه قد اللى مشيتهم ومفيش حاجه اركبها ولا ميكروباص ولا حتى تكسيات كان ممكن ابليش يلعب ف دماغى واركب تكسي _اعذرونى انا كنت ف حالة ضعف وانتوا مشوفتوش الامم اللى بتبقي عند المحافظه والحتت دى _ومش لازم اذكر ان الطريق النحيه التانيه وانت داخل على سندوب كدا من اول المحافظه فضل واقف يجي ربع ساعه انا كا عادتى زهقت وقلت امشي قدام شويه مشيت لحد عوض الله ماركت و وانا ماشيه شوفت مينا _محدش ليه دعوه مين مينا دا بس هو واحد غير نارمر موحد القطريين_انا بيني وبينكم حقدت عليه_محدش يفهمنى غلط انا متسامحه مع الديانات الاخرى وانا مينا زمايل مكتبه واحده وايزي يعني باستثناء انى قرءت شويه ف الانجيل وكان عفريتي مش بيطلع برئي فيه الا لما يكون مينا داخل علي الشله _سبب حقدى عليه انه مش مضطر يرجع بيتهم الساعه9 ومش لاقى حاجه يركبها وان المكتبه قريبه منه جدا وانه ولد وصايع مع صحابه ف الشارع المهم بعد ما رحت عند عوض الله و وقفت شويه وزهقت ورجعت تانى عند البنك و وقفت شويه لحد ما اتخنقت قررت اطلع قدام شويه عند المحافظه _اعمل ايه عايزه اروح _و روحت عند المحافظه و وقفت الشويه اللى فيهم النصيب لحد ما اتخنقت وقربت اعيط _كنت بتمنى ساعتها ان ابليس يلعب ف دماغى و اقرر اروح مشي مع العلم انى روحت من عند المحافظه لحد بيتنا مرتين مشي بس امى قالتلى معملش كدا تانى قال ايه ياخويا انت وهو ان الكونيش حتى ساعة العصريه مكان مش لطيف و مينفعش امشي فيه لوحدى اقوم امشي فيه الساعه १० دول كانوا اقاموا عليا حد الرده وانا اعمل ايه يعني مانا همشي _دونا سير لو نيل_يعين على شط النيل عشان دا اقصر واامن طريق بالنسبه لمعاييرى اه وبعد ما وقفت عند المحافظه لحد ما كنت هعيط قلت ارجع ورا شويه رجعت وقفت قدام المديريه _على فكره اكبر مغامره ممكن الواحد يعيشها ف المنطقه انه يعدي الطريقه دا رعب حقيقي_وفكرت ادخل جوا توريل بس المنظر مشجعنيش بعد ما يئست قلت اخد بنصيحه جدتى قالتلى لو معرفتيش تركبي ارجعى تانى مع انه النوم عند جدتى شيء فوق احتمالى_اسباب عائليه عايزيني افضح اسرار العيله واقولك انى مش بطيق خالى وانه هيطلع عفاريتي لو نمت عندهم غير انه حشاش قصدي مدخن للى ميعرفوش لغتى_ اه بقي قلت هرجع لتيته وامرى لله وانا ماشيه حاسه من حالة التكشير والتبويز الى انا فيهم ان شفايفي هيقعوا منى او ممكن يطولوا وكنت خايفه يثبتوا على كدا واعنس تصدقوا بقي انى لما وصلت لنقظة الركوب الاولى اللى هى عند السوق وانت داخل الدراسات كدا قبل بيت جدتي بشويه تصدق يعنى انى الاقى ميكروباص فاضي اه واللهى وكنت عديت الطريق رجعت تانى وركبت لقيت التباعر ربنا ما يوريك بيقولى رايحه فين قلتله طلخا قالى انا اخرى موقف شربين انا كان كل همى انى اعدى الكوبرى وابقي ف طلخا مع استثناء ان بيتنا ف نص البلد اه واللهى وركبت وكل فرحه وامل انى هرجع لامى حبيبتي والراجل الواطى _استغفر الله_اه هو واطى انا احب اوصف كل شئ بانسب وصف ليه نزلنى عند موقف شربين وكمل الطريق لجوا وانا مشيت و دخلت شقتنا الساعه 10ونص يعني يا ولاد الحلال ساعتين عشان اروح بيتنا والراجل اللى معندوش ضميرنزلنى بعيد اللى انا عايزه اقوله ان من حق المواطن المصري انه يتخلف عن مواعيده بالقدر اللى يسمح بيه سواقين المكيروباص وبتوع التكسيات وظباط المرور المهم ان سلوي_اللى هى خالتى_ اتجوزت حد يسمعنا زغروطه بقي

متعة ركوب الميكروباص

2007-07-14T01:14:00.000+03:00

شويه و هقوم انام عندى كام مشوار بكره بس يارب ابويا يسيبنى اخرج كنت بقول انه تعبان وهيبقي طيب وحنين وهيسيبنى استمتع بايام اجازتى الاخيره _قولوا يا رب لكل ابن من بنى ادم متعه ف الحياه وانا بستمتع جدا بركوب الميكروباص_بالحق مش متاكده ان هى دى متعتى ف الحياه_ بالتغاضى والتغاضي_ دا بلفظ اخر يعني بالتنفيض _اه بالظبط بالتغاضي على انه وسيلة نقل غير مكلفه يعني تدفع ربع جنيه عشان توصل لاقرب نقطه من بيتك او جهتك المقصوده ولا تدفع اربعه ولا خمسه جنيه عشان توصل لفس النقطه هو لو اربعه هيوصلك لنقطه ابعد لكن خمسه بيوصلك لنفس النقطه يعني بمواصله واحده بواسطة التاكسي من اى حته ف المنصوره لطلخا تكافئ 20مشوار بين طلخا والمنصوره بالميكروباص ولانى ساكنه ف طلخا وما ادراك ما طلخا_انت طبعا لا تدرك ما هى طلخا الا اذا كنت احد سكان محافظة الدقهليه_ان كنت تدرى شئ عن بير الرخامه _طلخا_فاسمحلى اولا اصحصح معلوماتك عن اصولى وجذورى انا مقيمه ف طلخا لكن جذورى تتفرع بين المنصوره من نحية ميلاد وحياة لامى والمحله من نحية عيلة ابويا ولنتجاهل ان جدى وسبب ظروف شغله جه عاش ف طلخا واشترى فيها بيت ايام ما كانت مجرد اراضي زراعيه متلاصقه على مر البصر ولولا حبي ليك كنت دعيتك لزيارة طلخا هى حلوه _بالنسبه لبعض معاييري_ يخرب بيت الرغى والدش بس تقولوا ايه فرغ عاطفى ندخل على المفيد ياخوانا سر حبي لركوب الميكروباص انه بيمثل ليا حريتي اللى محرومه منها انا واحده مفتريه ومهوسه بالصحه واللياقه واى مشوار جوا طلخا مستعده تماما وتحت اى ظروف اعمله مشي_سيرا على الاقدام يعني_ بس انا مش عايزه اللى يشوف البوست دا يقعد يفكر اد ايه انا ممشوقة القوام دول وعرض ومن غير محيط ولا اد ايه انا محرومه من نعيم الحياه ومش بخرج من بيتنا ولا اد ايه انا ظروفى الماديه صعبه وبوفر فلوس التاكسي واركب ميكروباص مع العلم انى فعلا بوفر بس بردوا فى شئ موروث عائلى عندنا ان البنت متلاكبش تاكسي لوحدها خوفا من الذئاب البشريه ومحدش يديني الفرصه اتكلم عن الذئاب البشريه مش موضوعنا محدش يحاول ابدا انا واحده صاحبة مبادئ وبما انى هتكلم عن متعة ركوب الميكروباص هيبقي هتكلم عن الموضوع دا بحب اركب الميكروباص بالاضافه لللى انا قلته فوق ف لانى بحس انى ف النادى وانا راكباه كل الناس بتركب ميكروباص مهندسين ومحاميين ودكاتره وتلاميذ بنات و والاد وستات هحكيلكم على مغامراتى اللى فاكراه يعني اقدم مغامره حصلت وانا راجعه من عند تيته من المنصوره ،ركبت قدام جمب راجل عجوز والواضح انى اعجز منه انا عندى حساسيه بس مش بطريقه مرضيه يعني بتعب لما اشم اي ريحه وبطنى بتوجعنى وبخصوص السجاير نفسيتي بتتعب منها المهم انه بيدخن وينفض السجاير من الشباك والهوا يرجعها عليا وانا انفض هو بقي نصحنى نصيحه جدويه على وزن اخويه وقالى منفضش هدومى الا لما انزل وامشي فانا جمعت شتاتى وقلتله ما تطفى السجاره احسن قالى مقدرش قلتله على فكره فى قانون يمنع التدخين الراجل كان ذوق وقعد يشكيلى من السجاير وانه مش قادر يبطلها وانها عاده من سنين وانا اندمجت معاه وقعدت اقوله ايه ممكن يساعده انه يبطل تدخين ولما ذكرتله انى بدايق من السجاير قالى يعني لو جالك واحد كويس وعيبه التدخين هتقوليله مع السلامه ولا اهلك هيرفضوه قلتله اه يرفضوه اوى دا لو انا وافقت هما يرفضوه قالى حتى لو بتحبيه قلتله مظنش انهم يرضوا بيه مش هقولكم انى شايفه ان التدخين شئ ينقص من رجولة اى راجل مش موضوعنا بس الكلام مع الراجل دا كان ممتع الموقف اللزيز التانى كان يعتبر اول يوم ف اجازتى حوالى الساعه9 ونص الصبح جهزت وخرجت وركبت الميكروباص فى طريقي للشيخه كريمه ف شارع الثانويه اللى طبعا ف المنصوره قعد جمبي واد شكله انسان محترم ونضيف هو اسود شويه بي نضيف انا عارفه ان معاييرنا مختلفه بس هو كان نضيف لقيت الواد متوتر ومعاه شوية ملخصات وعمال يرسم لوجو لزيز عليها فضلت متبعاه شويه وكنت بحسب ان اليوم دا امتحان الثانويه العام هيبداء سئلته انت عندك امتحان قالى اه سالته ف كلية ايه قالى حقوق فتره من الصمت سالنى انتى بردوا ف حقوق قلتله لاء انا لسا مخلصه اولى ثانوى بس انا رايحه احفظ قرءان عند واحده ف شارع الثانويه وبس انا عملت حاجه وحشه غلطت يعني ؟؟ الواد كان متوتر وعنده امتحان و الطريق طويل اللى عملته انى خلقت فرصه انسيه انه عنده امتحان واخليه ريلاكس اخر حاجه بقي كانت قريب حظى وقعنى جمب راجل ميكانيكي بس كان راجل نضيف بكل معنى الكلمه_هدوما وفعلا وموضوعا_المهم بقي اللى حصل ان واحده حصل بينها وبين التباع خلاف على فلوس عشان قديمه هو اخدها وادهم فلوس نضيفه_مانا قلت راجل نضيف_وقعد بقي يحكي للناس على الورقه ام 200وان زبون اداه نص الفلوس اللى هى ورقه ب 200وكانت مزوره وان حصله مشكله واتعمله محضر ف البوليس انا طبعا تدخلت وقلتله انت ليه متعملش سجلات للزباين بتوعك تحط فيهم اساميم وتليفوناتهم قعد يقولى خليها على الله وملهوش لازمه وسالنى انتى رايحه الدرس لان كان معايا كشكول قلتله لاء انا خلصت الامتحانات انا رايحه المكتبه _مكتبة مبارك العامه_قالى انه بيروح هناك وبيحضر انشطه بس بيكون بليل ولما سالنى عايزه تكونى ايه قلتله عيزه اروح اعلام وادرس تقديم واخراج قالى كويس بس متعمليش زي هاله سرحان قلتله لاء طبعا مليش ف الحاجات دى شئ لزيز واللهى دلوقتى هقوم قبل ما يحصل ف البيت مصيبه تصبحوا على خير

اول حدودته

2007-06-19T19:26:00.000+03:00

اجلت الكتابه ف البلوج بتاعى يجي شهر جه ف دماغى مواضيع كتير وبداءت فعلا اكتب فيه مره بس مسحت اللى كتبته ونسيت البلوج فتره طويله بطبعي مبكتبش اللى لا عواطفى تغلبني واغرق ف بحر من الحزن والالم والنهارده كان يوم كئيب جدا معيطتش بقالى كتير بالطريقه المميته دى بس انتوا مالكوا بالاكتئاب دا دى مشاكلى انا انا هحكيلك الحدودته وزي ما كانوا بيقولوا زمان ياترى الحدوته حلوه ولا ملتوته _انا مشوفتش ف معاجم اللغه كلمة ملتوته دى بس تفكيري المتواضع هدانى لانها كلمه عكس حلوه_واضمنلكم انها ملتوته خالص انا يا ناس بنت مصريه عاديه خالص اه واللهى شبه كل الشباب اللى تحت العشرين او عدوا العشرين بسنه او اتنين مراهقه يعني من الاخر بفكر وبتصرف وبحس وباثر وبفهم وبقرر على نفس المنوال مع اختلاف الطريقه ناس كتير بتقولى انى سبقت سنى وانا متفقه معاهم على كدا_للعلم اهلى مش من ضمن الناس دول_ مع انى كنت بشوف نفسي انسانه ناضجه ودا حقيقي بطريقه ما بس مؤخرا مش عارفه ليه عامله المراهقه شماعه لكل مشاكلى اكيد السبب مش لانى مش لاقيه لمشاكلى حل_ انا زي ما قولتلكم مراهقه_بس لانى عرفت ان المراهقه مش مجرد كام سنه اسود من بعض لازم نعيشهم انا عرفت ان سبب اللى بيمر بيه الشباب ف مراهقتهم ليه اسباب فسيولوجيه حتى لو كنا بنتصرف كاننا ناس وحشين ف الفتره دى وانا منكرش ان لينا تصرفات مش موزونه بس اهالينا بيساهموا ف زيادة حدة الفتره دى بيفتركوا كل الاقوال الماثوره والامثال الا المثال اللى بيقول(ان كبر ابنك خاويه)مين فبلدنا دى ابوه بيخاويه في بنوته ف زمنا ومكانا دا امها هي سرها هو ف المسلسلات بشوف من دا كتير بس على ارض الواقع تؤتؤتؤبالتلاته يعني كنت متخيله انى اتعس اهل الارض بس صدقونى فى اتعس منى كتير _بخرج انا عن النص كتير انا مش هحكى حكايتي كل واحد مكفيه اللى هو فيه _مش انا عامله البلوج دا عشان الكل يتكلم يبقي هحكي حكايتي بقي بس تتحملوا لانى سوبر رغايه_باختصار شديد اوى_انا عايزه حقي .......اه واللهى محدش يتنحلى كدا انا عايزه حقي ،يا ناس يا هو عايزه حقي عايزه ماما وبابا واخوات مش ف الاوراق الرسميه انا عايزاهم بجد عايزه حقي منهم مش عايزه عرايس صلصال انا عايزه اللى يسمعنى ويفهمنى ويحتويني يديني حرية القرار مدام مبعملش الحرام_اقولكم سر_انا بحس انى بتعاقب لان ربنا خلقنى بنت لاء والمشكله العويصه انى حلوه شويتين وبصاب بحالات دلع لا اراضي حد يقولى اعمل ايه _قالوا زمان ان اقصر طلايق بين نقطين هو الخط المستقيم و انا عبيطه وصدقت تقولوا ايه مراهقه بقي وبتاعة شعارات_ واجهتهم وكانت الكارثه ان كان ابويا تفهم الا حد ما لكن رد فعل امى كان نارى زي ما يكون خافت تحس انى محتاجه لاكتر من الاكل الشرب واللبس والفلوس شتمت بما فيه اكثر من الكفايه وقعدت تحسسنى اد ايه انا ناكره للنعيم اللى هي معيشاني فيه مع انها بتعملى اللى بتعمله خدامه وانا متاكده ان الخدامه ممكن تعمل اللى هي بتعمله احسن منها لانها هتاخد مقابل مادى انا عايزه اخد حقي و اديها حقها مش هاممنى الفلوس وانا اساسا مش باخد اكتر من حد من زمايلى ولا هاممنى فسح مع انى اساسا مش بشوف الشارع الا لما اخرج للدروس و المدرسه نفسي يبطلوا يقارنوا بيني وبين ناس يعرفوهم وعيالهم ويقدروا انى مختلفه عنهم وعن معارفهم وعيال معارفهم_على فكره كل يوم بيتصدموا ف حد يعرفوه_ انا عايزه حقوقى اللى بيكفلها ليا الدين والقانون عايزه حقوقى الانسانيه عايزه احس بحبهم ليا عشان مكررش غلطى و ادور على راجل احبه ويحبنى ويديني اللى انا محتاجاله وهم مش فهمين هو ايه بالنسبالى_دي حكايتى باختصار شديد جدا جدا ياريت الشباب اللزيز اللى يعدي هنا يقول كل اللى ف نفسه و دمتم بكل خير ورضا